शुशिला पन्त / सुदूरपश्चिमको पहाडी जिल्ला डोटीमा एक हजार एक सय १ जनामा कोरोना संक्रमण पुष्टी भएको छ ।
जिल्लामा रहेका ९ वटा स्थानिय तहहरुमा उक्त संख्यामा कोरोना संक्रमित देखिएको स्वास्थ्य कार्यालय डोटीले जनाएको छ । कुल संक्रमितहरु मध्ये हाल सम्म ९ सय ८५ जना निको भई घर फर्किएका छन् भने १ सय ४३ जना सक्रिय संक्रमित रहेका छन् ।
त्यस्तै शनिवार बेलुकी ४ बजे सम्मको तथ्यांकलाई हेर्ने हो भने अझै १ सय ७६ जनाको पिसिआर परिक्षण हुन बाँकी रहेको डोटीका स्वास्थ्य प्रमुख रमेश मलासीले बताए ।
चिनको बुहान शहर बाट सुरु भएको कोरोना भाईरसको संक्रमण डोटीमा पहिलो पटक जेष्ठ महिनामा देखिएको थियो । जेष्ठ महिनामा १३ जनामा देखीएको संक्रमण ५ महिनाको दौरानमा ११ सय १ जनामा देखिएको हो ।
जिल्लामा सबै भन्दा बढी संक्रमित अषाढ महिनामा पहिचान भएका छन् । सो महिनामा १३ जनामा देखिएको संक्रमण ह्वात्तै बढेर ५ सय २४ जना कोरोना पुष्टी भएको थियो । त्यस्तै श्रावण महिनामा २ सय ७ जना र भाद्र महिनामा २ सय ८५ जनामा कोरोनाको संक्रमण पुष्टी भएको हो । त्यस्तै अषाढ महिनाको मध्ये सम्म पुग्दा जिल्लामा ७२ जनामा संक्रमण देखिई सकेको छ ।
करिब २० हजारको संख्यामा छिमेकी मुलुकमा रोजगारी गर्दै गरेका मानिसहरु जिल्लामा भित्रिएको भए पनि हाल सम्म ९ हजार ९ सय १२ जनाको मात्र थ्रोव श्वाव संकलन भएको छ । भारत बाट भित्रिएका मध्ये पनि आधा भन्दा बढीको थ्रोव संकलन नै नभएको स्वास्थ्य कार्यालय डोटीको तथ्यांकले देखाउन्छ ।
