काठमाण्डौ / नेपाल चिकित्सक संघले कोरोना भाइरस संक्रमणबाट चिकित्सकको मृत्यु भएमा एक करोडसम्मको बीमा रकम भुक्तानी दिन माग गरेको छ ।
त्यस्तै स्वास्थ्य मन्त्रालयमा ज्ञापनपत्र बुझाउँदै संघले उपत्यका बाहिर कोरोना भाइरस संक्रमणबाट बिरामी परेका चिकित्सकहरुलाई काठमाडौं ल्याउन समेत सरकारसँग माग गरेको छ ।
संघका अध्यक्ष लोचन कार्की र महासचिव डा. बद्री रिजालले हेलिकोप्टरबाट काठमाडौं ल्याउन सरकारसँग गरेका हुन् । संघले कोरोना संक्रमण भएका चिकित्सक तथा स्वास्थ्यकर्मीको उपचार खर्च सबै सरकारले व्यहोर्नुपर्ने माग गरेको छ।
संघले कोरोना संक्रमणबाट चिकित्सकको मृत्यु हुन थालेपछि सरकारले स्वास्थ्यकर्मीको उपचारमा आवश्यक व्यवस्था गर्नुपर्ने माग गरेको हो । ‘काउन्सिलको निर्देशिकामा उल्लेख भएका अत्यावश्यक औषधि इन्जेक्सन, रिमेडेसिभर लगायतका कोभिड उपचारमा आवश्यक पर्ने भेन्टिलेटर, अक्सिजन, आइसियु बेड र जनरल बेडको बढाउनु पर्नेछ’, संघले विज्ञप्तिमा भनेको छ।
संघले कोरोना युद्धमा होमिएका स्वास्थ्यकर्मी तथा चिकित्सकको मनोबल उच्च पार्न सुरक्षाका सामाग्रीहरुको सहज उपलब्ध गराउन सरकारसँग माग गरेको हाे ।
