समिक्षा आचार्य, काठमाण्डौ / नेपाल सरकारले मुलुकमा कोरोनाको जोखिम बारे अझै पूवार्नुमान गर्न सक्ने अवस्थामा नभएको सरकारका प्रवक्ता तथा परराष्ट्रमन्त्री प्रदीप ज्ञवालीले बताएका छन् ।
मन्त्रिपरिषदको निर्णय सार्वजनिक गर्न आयोजित पत्रकार सम्मेलनमा मन्त्री ज्ञवालीले यस्तो बताएका हुन् । नेपालमा कोरोना संक्रमण बढि रहेको र जोखिम कहिलेसम्म रहन्छ भन्ने अनुमान गर्न सरकारलाई पनि कठिन भएको मन्त्री ज्ञवालीले संकेत गरे ।
मन्त्री ज्ञवालीले भने, ‘नेपालमा निरन्तर संक्रमण बढिरहेको छ । कुनै विन्दुमा पुगेर हामी विस्तारै ओरालो लाग्न सुरु गर्छौं । संक्रमण नियन्त्रणको अवस्थामा जान्छ । अझै पूर्वानुमान गर्न सकिने अवस्था छैन’ उनले थपे, ‘यो बेला सबैको उच्चस्तरको सतर्कता, साथ र सहयोगको जरुरत छ ।’
सरकारले कोरोनाको जोखिम कम भएर नभई जीवन र जीविकाबीच सन्तुलनको आवश्यकताका कारणले धेरै क्षेत्र खुला गरेकोले चाडपर्वका समयमा अझै सतर्कता अपनाउनु पर्ने उनले बताए ।
त्यस्तै मन्त्री ज्ञवालील भने ‘स्वास्थ्य मन्त्रालयको प्रोटोकल छ, विश्व स्वास्थ्य संगठनले जारी गरेको प्रोटोकल छ । त्यसविपरीत जबर्जस्ती परीक्षण गर्नु उचित हुँदैन । त्यसले कुनै परिणाम पनि दिँदैन’
काठमाडौंमा घरधनी र केही औद्योगिक प्रतिष्ठानले पीसीआर रिपोर्टका लागि सर्वसाधारणलाई बाध्य बनाएको भन्दै सन्र्दभमा उनले यस्तो बताएका हुन् ।
