डोटी / दुई वर्षअघि देखि डोटीको जोगीडाब्रेमा स्थित शिक्षक तालिम केन्द्रमा अस्थायी रूपमा बस्दै आएको सशस्त्र प्रहरी बलको ३६ नम्बर गणले आफ्नै भवन बनाउने भएको छ ।
जिल्लाको दिपायल सिलगढी नगरपालिका–४ कुमालीकोट, राजपुर तथा कुल्पाते सामुदायिक वनले जग्गा दिन सहमति देखाए संगै उक्त कार्यालयको आफ्नै संरचना बन्ने भएको हो ।
लामो समय देखी जग्गाको खोजी गर्दै आएको सो गणका लागि अब आफ्नै जमिन सहित भवन निर्माणका लागि गृहमन्त्रालयबाट बजेट विनियोजन भएपछि गणले त्यहाँका स्थानीयवासी तथा सरोकारवालाहरुसँग राय सुझाव समेत लिएको छ ।
राय सुझाब लिनका लागी सशस्त्र प्रहरीले दिपायलमा आयोजना गरेको एक कार्यक्रममा उक्त सामुदायिक वनमा कार्यालय स्थापना भए सामुदायिक वन सहित नागरिक सुरक्षामा समेत सहयोग पुग्ने कार्यक्रममा सहभागीहरुको राय थियो ।
वनको उपभोक्ताहरुको छलफल पछि आफुहरुले उक्त कार्यालय स्थापनाका लागी जमिन दिने निधो गरि भवन निर्माण गर्न समुदायबाट नै सहमति दिने निर्णय समेत गरेको कुमालीकोट, राजपुर तथा कुल्पाते सामुदायिक वनका अध्यक्ष रतनबहादुर कठायतले बताए ।
उनले भने, “सशस्त्र प्रहरी बलको गण स्थापना गरिए सामुदायिक वनमा चोरी सिकार रोकिने तथा काठ चोरी पनि रोकिने भएको र सबै नागरिकलाई सुरक्षा मिल्ने भएकाले हामीले सहमति दिएका छौँ ।”
