कैलाली , तिहार तथा छठ पर्व मनाउन भारतका विभिन्न सहरबाट स्वदेश फर्किने नेपालीको चाप बढेसँगै कैलालीको गौरीफन्टा नाकामा यात्रुले सास्ती खेप्नुपरेको छ। सीमामा पर्याप्त व्यवस्थापन नहुँदा यात्रुहरू घण्टौँसम्म लाइनमा बस्न बाध्य भएका छन्। दुई–तीन दिनको लामो यात्रा गरेर घर फर्किएका नेपालीलाई सीमामा समेत लामो समय प्रतीक्षा गर्नुपर्दा थप थकान र हैरानी हुने गरेको छ। वर्षौँपछि परिवारसँग भेट्ने र चाडपर्व मनाउने उत्साह बोकेर आएका यात्रुहरू सीमा पार गर्नै घण्टौँ कुर्नुपर्ने अवस्थाले निराश बन्ने गरेका छन्।

भारतमा रोजगारी गर्दै आएकी बनबेहडाकी कित्थि आफ्ना बालबालिकासहित घर फर्किएकी छन्। गौरीफन्टा नाकामा भेटिएकी उनले भारततर्फको सीमामा करिब एक घण्टा लाइनमा बसेपछि मात्रै नेपाल प्रवेश गर्न पाएको बताइन्। ‘घर आउन पाउँदा एकदमै खुसी लागेको छ। अब परिवारसँगै बसेर दीपावली मनाउने हो। सबैसँग भेटघाट गर्न पाइन्छ भन्ने खुसी छ,’ उनले भनिन्, ‘लामो यात्रा गरेर थकित अवस्थामा आइयो, सीमामा पनि उत्तिकै समस्या भयो।’ भारतको लुधियानाबाट फर्किएका डोटीको बोगटानका शेरबहादुर बिहान ५ बजे नै गौरीफन्टा पुगेका थिए। तर, लामो समय लाइनमा बस्नुपर्दा बिहान १० बजेसम्म पनि घरतर्फको यात्रा सुरु गर्न नसकेको उनले बताए। ‘हामी बिहान ५ बजे नै पुगेका हौँ। धेरै भीड थियो। लामो समय लाइनमा लागियो। बिहानको १० बजिसक्यो, अझै घर जाने यात्रा सुरु गर्न सकिएको छैन,’ उनले भने, ‘आज घर पुगिन्छ कि पुगिँदैन भन्ने चिन्ता छ। भोलि भाइटीका छ, तर घर कतिबेला पुग्ने भन्ने टुङ्गो छैन।’

दीपावली तथा छठ पर्वका साथै सुदूरपश्चिमका पहाडी जिल्लामा लाग्ने जात्रा र मेलामा सहभागी हुन भारतबाट फर्किने नेपालीको सङ्ख्यासमेत बढेको छ। तर यात्रुको चापअनुसार सीमा क्षेत्रमा व्यवस्थापन हुन नसक्दा आवागमन असहज बनेको यात्रुको गुनासो छ। भारतबाट फर्किएका भीमबहादुर भुलका अनुसार लामो यात्राको थकानसँगै भारी सामान बोकेर घण्टौँ लाइनमा बस्नुपर्दा यात्रुलाई थप समस्या हुने गरेको छ। ‘एकातिर भारी सामान, अर्कोतिर लामो लाइन र घण्टौँको प्रतीक्षा। यात्रामै थाकेर आइन्छ, तर सीमामा पुगेपछि पनि सहज रूपमा छिटो आउन सकिँदैन,’ उनले भने, ‘सबै जना एउटै हुलमा हुँदा लामो समय कुर्नुपर्ने बाध्यता छ।’

यात्रुहरूले ज्येष्ठ नागरिक, बिरामी, महिला तथा बालबालिकाका लागि छुट्टै प्राथमिकता लाइनको व्यवस्था गर्न माग गरेका छन्। विशेषगरी उपचार गराएर फर्किएका बिरामी, शल्यक्रियापछि आराम गर्नुपर्ने व्यक्ति, शारीरिक रूपमा अशक्त तथा काखमा शिशु बोकेका महिलालाई लामो समय लाइनमा उभिन कठिन हुने गरेको छ। सीमामा यात्रुको चापलाई ध्यानमा राखेर प्राथमिकताका आधारमा छुट्टाछुट्टै लाइनको व्यवस्था गरिए आवागमन सहज हुने उनीहरूको अपेक्षा छ।