भदौ ३०, डोटी / डोटीको दिपायल स्थित सेती नदीमा हाम फालेकी एक युवती बेपत्ता भएकी छन्।
मंगलबार साँझ दिपायल सिलगढी नगरपालिका–३ मा रहेको झोलुङ्गे पुलबाट करिब २२/२३ वर्षीया प्रिंयका श्रेष्ठ नदीमा हाम फालेकी हुन्। उनी दिपायल सिलगढी नगरपालिका–६ नाचनथलीका श्रीचन्द्र श्रेष्ठकी छोरी हुन्।
घटनाको खबर पाएपछि प्रहरीले तत्काल नदी आसपासमा खोजी सुरु गरेको छ। इलाका प्रहरी कार्यालय दिपायलबाट प्रहरी नायब निरीक्षक डम्बरबहादुर कठायतको नेतृत्वमा १० सदस्यीय टोली खोजीमा परिचालन गरिएको छ।
यस्तै, जिल्ला प्रहरी कार्यालय डोटीबाट प्रहरी उपरीक्षक सागर बोहराको नेतृत्वमा थप १० जना प्रहरी घटनास्थलमा खटिएका छन्।
प्रहरीका अनुसार युवतीको खोजी कार्य जारी रहे पनि साँझसम्म उनको अवस्था पत्ता लाग्न सकेको छैन। घटनाबारे थप अनुसन्धानसमेत भइरहेको प्रहरीले जनाएको छ।
