सिलगढी। देशभर पश्चिमी वायु, स्थानीय वायु तथा पूर्वी भू–भाग नजिक रहेको न्यून चापीय क्षेत्रको प्रभाव कायम रहेकाले आज पनि विभिन्न स्थानमा वर्षा, चट्याङ र हुरी चल्ने सम्भावना रहेको छ।
जल तथा मौसम पूर्वानुमान महाशाखाका अनुसार अहिले देशका हिमाली तथा पहाडी भू–भागमा सामान्यदेखि पूर्ण बदली रहेको छ भने तराई क्षेत्रमा आंशिक बदलीको अवस्था छ।
कोशी, बागमती, गण्डकी, कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित मध्यम वर्षा भइरहेको महाशाखाले जनाएको छ।
आज दिउँसो देशभर सामान्यतया बदली रहनेछ। गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा केही स्थानमा मेघगर्जन र चट्याङसहित वर्षाको सम्भावना रहेको छ। यस्तै मधेश प्रदेशसहित कोशी र बागमती प्रदेशका तराई क्षेत्रमा पनि एक–दुई स्थानमा पानी पर्न सक्ने पूर्वानुमान गरिएको छ।
उच्च हिमाली क्षेत्रमा हल्का हिमपातको सम्भावना रहेको मौसमविद्हरूले बताएका छन्। सुदूरपश्चिम, कर्णाली र लुम्बिनी प्रदेशका तराई तथा पहाडी क्षेत्रमा हुरी चल्न सक्ने भएकाले सतर्कता अपनाउन आग्रह गरिएको छ।
महाशाखाका अनुसार रातिको समयमा पनि मौसम पूर्ण रूपमा खुल्ने सम्भावना छैन। लुम्बिनी र सुदूरपश्चिम प्रदेशसहित देशका पहाडी तथा हिमाली क्षेत्रमा बदली रहने तथा विभिन्न स्थानमा मेघगर्जनसहित वर्षा जारी रहने अनुमान गरिएको छ।
मौसमका कारण दैनिक जनजीवन, सडक तथा हवाई यातायातमा असर पर्न सक्ने भएकाले आवश्यक सावधानी अपनाउन महाशाखाले अनुरोध गरेको छ।
