कञ्चनपुर । कञ्चनपुरको बेलडाँडी गाउँपालिका–२ क्याम्प चेकपोष्ट नजिक दैजी–बेलडाँडी सडकखण्डमा बाघको आक्रमणबाट जोगिन खोज्दा मोटरसाइकल दुर्घटना भएको छ। दुर्घटनामा एक बालिकासहित चार जना घाइते भएका छन्।

बुधबार राति करिब सवा ८ बजे शुक्लाफाँटा राष्ट्रिय निकुञ्ज क्षेत्रभित्र दैजीबाट बेलडाँडीतर्फ जाँदै गरेको सुपप्र ०१–००९ प ७६३० नम्बरको मोटरसाइकलमाथि अचानक बाघ झम्टिएको प्रहरीले जनाएको छ। बाघ देखिएपछि मोटरसाइकल अनियन्त्रित भएर सडकमै पल्टिएको बताइएको छ।

दुर्घटनामा मोटरसाइकल चालक बेलौरी नगरपालिका–९ रतनपुरका बिरेन्द्र ठगुन्ना घाइते भएका छन्। उनको दाहिने खुट्टा, दुवै हात र शरीरका विभिन्न भागमा चोट लागेको छ भने अवस्था सामान्य रहेको प्रहरीले जनाएको छ।

मोटरसाइकलमा सवार उनकी श्रीमती कल्पना ठगुन्नाको टाउको, अनुहार र दुवै खुट्टामा चोट लागेको छ। यस्तै, दुई वर्षका छोरा रियान्स ठगुन्नाको टाउको र अनुहारमा चोट लागेको प्रहरीले जनाएको छ।

दुर्घटनामा भीमदत्त नगरपालिका–१५ खैरिबस्तीकी १४ वर्षीया आरुसी साहु गम्भीर घाइते भएकी छन्। उनको टाउको, अनुहार र हातमा चोट लागेको तथा उपचारका क्रममा अचेत अवस्थामा रहेको जनाइएको छ।

घाइते चारै जनालाई महाकाली प्रादेशिक अस्पताल महेन्द्रनगरमा प्रारम्भिक उपचारपछि थप उपचारका लागि धनगढीस्थित माया मेट्रो अस्पताल पठाइएको प्रहरीले जनाएको छ।