कैलाली /कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयमा आगामी शैक्षिक सत्रदेखि चिकित्सा शिक्षा अध्यापन सुरु हुने तयारी गरिएको छ। विश्वविद्यालयले यसै वर्षदेखि एमबिबिएससहित विभिन्न विषयमा पढाइ सञ्चालन गर्न आवश्यक प्रक्रिया अघि बढाएको हो।
विश्वविद्यालय सभाको चौथो बैठकले शैक्षिक कार्यक्रम सञ्चालनका लागि आवश्यक ६ वटा नियमावली पारित गरिसकेको छ।
विश्वविद्यालयका रजिस्टार डा. खेमराज जोशीका अनुसार गेटामा यस वर्षदेखि एमबिबिएस, बीएस्सी नर्सिङ, मेडिकल ल्याब टेक्नोलोजी र बीएस्सी अप्टोमेट्री विषयमा अध्ययन सुरु हुनेछ। यसका लागि चिकित्सा शिक्षा आयोगसमक्ष ५० एमबिबिएस, ३० बीएस्सी नर्सिङ, २० मेडिकल ल्याब टेक्नोलोजी र २० बीएस्सी अप्टोमेट्री सिटका लागि आवेदन दिइएको छ।
उनका अनुसार कक्षा १२ को नतिजा सार्वजनिक भएपछि आयोगले प्रवेश परीक्षा लिनेछ र त्यसपछि शैक्षिक कार्यक्रम सञ्चालन हुनेछ। विश्वविद्यालयले मंसिर–पुसदेखि पढाइ सुरु गर्ने लक्ष्य राखेको छ र आवश्यक तयारी भइरहेको जनाएको छ।
अस्पताल तथा शैक्षिक कार्यक्रम सञ्चालनका लागि विश्वविद्यालयले आगामी आर्थिक वर्षका लागि दुई अर्ब ५८ करोड रुपैयाँ बजेट माग गरेको छ। उक्त प्रस्ताव प्रधानमन्त्री कार्यालय हुँदै अर्थ मन्त्रालयमा पुगेको छ भने छात्रवृत्ति कोटाको बजेट सुनिश्चित भइसकेको जानकारी दिइएको छ।
यसैबीच, विश्वविद्यालयले शैक्षिक जनशक्ति व्यवस्थापनका लागि करार सेवामा २६ जना प्राध्यापक र ५१ जना उपप्राध्यापक नियुक्त गर्ने प्रक्रिया अघि बढाएको छ। फिजियोलोजी, प्याथोलोजी, इएनटी, जनरल सर्जरी, एनेस्थेसियोलोजी, इन्टरनल मेडिसिन, अप्थाल्मोलोजी, मेडिकल एजुकेसन र फार्माकोलोजीलगायत विषयमा जनशक्ति पूर्ति गरिने बताइएको छ।
