सिलगढी, माघ २१
नेपालमा हाल पश्चिमी न्यूनचापीय प्रणालीको प्रभाव कायमै रहेको मौसम पूर्वानुमान महाशाखाले जनाएको छ। यस प्रणालीको असरले बागमती र गण्डकी प्रदेशसहित देशका अधिकांश पहाडी तथा हिमाली भूभागमा सामान्यतया बादल लागेको छ भने बाँकी भूभागमा आंशिक बदली देखिएको छ।

महाशाखाका अनुसार आज दिउँसो तराईका केही स्थानमा हुस्सु तथा कुहिरो लाग्ने सम्भावना छ। कोशी, बागमती र गण्डकी प्रदेशका उच्च पहाडी तथा हिमाली क्षेत्रमा सामान्य बदली रहनेछ भने ती क्षेत्रका एक–दुई स्थानमा हल्का हिमपातसहित वर्षा हुन सक्नेछ।

रातिको समयमा पनि तराईका थोरै स्थानमा हुस्सु कायम रहने अनुमान गरिएको छ। कोशी, बागमती र गण्डकी प्रदेशका उच्च पहाडी तथा हिमाली भूभागमा आंशिक बदली रहनेछ भने बाँकी क्षेत्रमा मौसम मुख्यतया सफा रहने महाशाखाले जनाएको छ। ती प्रदेशका केही उच्च भूभागमा भने हल्का हिमपात र वर्षाको सम्भावना कायमै छ।

त्यसैगरी, कोशी, बागमती र गण्डकी प्रदेशका उच्च पहाडी तथा हिमाली क्षेत्रका थोरै स्थानमा मध्यम खालको हिमपातसहित वर्षा हुन सक्ने देखिएको छ। यसका कारण चिसो बढ्न सक्ने तथा दैनिक जनजीवन, पर्यटन, पदयात्रा, स्वास्थ्यसँगै हवाई तथा सडक यातायातमा प्रभाव पर्न सक्ने भएकाले आवश्यक सतर्कता अपनाउन मौसम पूर्वानुमान महाशाखाले अनुरोध गरेको छ।