सिलगढी, देशमा पश्चिमी न्यूनचापीय प्रणालीको आंशिक प्रभाव कायमै रहे पनि हाल अधिकांश स्थानमा मौसम क्रमशः खुल्दै गएको छ। जल तथा मौसम विज्ञान विभागका अनुसार कोशी, बागमती, गण्डकी र कर्णाली प्रदेशका पहाडी भूभागमा पूर्ण रूपमा बादल लागेको छ भने बागमतीका केही स्थान र गण्डकीका एक–दुई स्थानमा हल्का वर्षा भइरहेको छ।

दिउँसो तराईका धेरै स्थानमा हुस्सु लाग्ने अनुमान गरिएको छ। कोशी, बागमती र गण्डकी प्रदेशका उच्च पहाडी तथा हिमाली भूभागमा आंशिक बदली रहनेछ भने एक–दुई स्थानमा हल्का हिमपात र वर्षाको सम्भावना रहेको महाशाखाले जनाएको छ।

त्यसैगरी राति तराईका केही स्थानमा हुस्सु लाग्नेछ। लुम्बिनी, कर्णाली र सुदूरपश्चिम प्रदेशका साथै कोशी, बागमती र गण्डकीका उच्च पहाडी तथा हिमाली भूभागमा आंशिक बादल लाग्ने तथा एक–दुई स्थानमा हल्का हिमपात र वर्षा हुन सक्ने अनुमान गरिएको छ।

मङ्गलबार साँझदेखि सक्रिय भएर देशका धेरै स्थानमा वर्षा गराएको पश्चिमी न्यूनचापीय प्रणाली हाल बाहिरिएको मौसमविद्हरूले बताएका छन्। तर, त्रिभुवन विश्वविद्यालयको जल तथा मौसम विज्ञान विभागका सहप्राध्यापक तथा मौसमविद् विनोद पोखरेलका अनुसार आउँदो सोमबारदेखि फेरि अर्को प्रणाली नेपाल प्रवेश गर्ने सम्भावना छ।

उनका अनुसार उक्त प्रणाली सक्रिय भए हिजोजस्तै वर्षा र हिमपात गराउने संकेत देखिएको छ। आज भने उच्च पहाडी तथा हिमाली क्षेत्रका केही स्थानमा सामान्य वर्षा र हिमपात भए पनि अधिकांश स्थानको मौसम खुल्ने मौसम पूर्वानुमान महाशाखाले जनाएको छ।