डोटी । डोटीको बडिकेदार गाउँपालिकामा चट्याङ पर्दा दुई जना बालक घाइते भएका छन् भने एक घरमा क्षति पुगेको छ।

बडिकेदार गाउँपालिका–२ सडेखानमा घन्सराम लामिछानेको तीन कोठे एकतले कच्ची घरमा शुक्रबार साँझ करिब ७ः३५ बजे चट्याङ परेको जिल्ला प्रहरी कार्यालय डोटीले जनाएको छ। चट्याङको धमाकाले घरभित्र रहेका उनका नाती (छोरीका छोरा) करिब ७ वर्षीय दिपेश पुन मगर बेहोस भएका थिए।

घाइते बालकलाई तत्कालै स्थानीय मेडिकलमा पुर्‍याएर उपचार गरिएको छ। हाल उनको अवस्था मध्यम रहेको प्रहरीले जनाएको छ। चट्याङका कारण घरमा जडान गरिएको विद्युत् मिटर बक्स जलेको छ भने घरका भित्ताहरू चर्किएर भौतिक क्षति भएको छ।

यस्तै, सोही स्थानमा बसोबास गर्ने शेरबहादुर लामिछाने मगरका करिब १३–१४ वर्षीय छोरा गोकुल लामिछाने मगरको पिठ्युमा चट्याङको झिल्का लाग्दा सामान्य चोट लागेको छ। उनको पनि स्थानीय मेडिकलमै उपचार भइरहेको र अवस्था सामान्य रहेको जनाइएको छ।

चट्याङपछि प्रभावित घरका छ जना परिवारजन छिमेकीको घरमा सुरक्षित रूपमा बसिरहेको प्रहरीले जनाएको छ। घटनाको जानकारी प्राप्त हुनासाथ प्रहरी चौकी खड्यौली, डोटीबाट प्रहरी सहायक निरीक्षक विक्रम डंगौराको कमाण्डमा प्रहरी टोली घटनास्थलमा खटिएको छ।