बाजुरा,माघ ४ गते
बाजुराको गौमुल गाउँपालिका–२ माल्लोदुगुन (कुहुडा) मा विद्युत् सर्ट भएर भएको आगलागीमा स्थानीय विष्णु रोकायाको घर जलेर नष्ट भएको छ। आगलागीका कारण घरमा राखिएको नगद, अन्नपात, लत्ताकपडा लगायत सम्पूर्ण सामान जलेर खरानी हुँदा लाखौँ रुपैयाँ बराबरको क्षति भएको छ।
आज बिहान विद्युत् तार सर्ट भई आगलागी भएको हो। आगोले घरमा राखिएको नगद, बर्खाभरि मेहनत गरेर उत्पादन गरिएको अन्न तथा दैनिक जीवनमा प्रयोग हुने सामग्री पूर्णरूपमा नष्ट गरेको पीडित विष्णु रोकायाले बताए।
आगलागीबाट मानवीय तथा पशुचौपायामा क्षति नभए पनि परिवार अहिले खुला आकाशमुनि त्रिपालको सहारामा बस्न बाध्य भएको रोकायाको भनाइ छ।
“घर र घरभित्रको खानेकुरा, लगाउने कपडा सबै जलेर नष्ट भयो। अहिले परिवार चिसोमा त्रिपालको बास बस्नु परेको छ,” रोकायाले दुःखेसो पोखे।
बर्खाको समयमा मरिमेटी उत्पादन गरिएको अन्न र मजदुरी गरेर कमाएको ५० हजार रुपैयाँभन्दा बढी नगद जलेर नष्ट भएपछि परिवारको दैनिक गुजारा कसरी चलाउने भन्ने चिन्ता थपिएको उनले बताए।
गौमुल गाउँपालिका–२ का वडा अध्यक्ष देबबहादुर रोकायाका अनुसार आगलागीबाट विष्णु रोकायाको करिब २० लाख रुपैयाँभन्दा बढी क्षति भएको छ। पीडित परिवारको अवस्था दयनीय रहेकाले तत्काल राहत र सहयोगको आवश्यकता रहेको भन्दै स्थानीय सरकारले पहल गरिरहेको वडाध्यक्षले बताए।
पीडित रोकायाले सरोकारवाला निकाय तथा सहयोगी मनहरूलाई राहतका लागि अपिल गरेका छन् ।
