कैलाली, माघ २
कैलालीको चुरे क्षेत्रमा काठ तस्करीमा संलग्न सामुदायिक वनका पदाधिकारीहरू फरार भएका छन्। डिभिजन वन कार्यालयले निगरानी र खोजतलास तीव्र पारेपछि उनीहरू भागाभाग भएका हुन्।
चुरे क्षेत्रबाट अवैध काठ तस्करी र वन्यजन्तुको चोरीसिकार बढेको सूचनापछि डिभिजन वन कार्यालय धनगढीले विशेष अपरेसन सुरु गरेको थियो। सो क्रममा पछिल्लो एक महिनामै चुरे गाउँपालिकाका विभिन्न सामुदायिक वन क्षेत्र र गाउँबाट ठूलो परिमाणमा अवैध काठ बरामद गरिएको छ।
वरिष्ठ डिभिजनल वन अधिकृत रामविचारी ठाकुरका अनुसार चुरे गाउँपालिका–२ खैरालास्थित दुई सामुदायिक वनका पदाधिकारीहरू नै काठ तस्करीमा संलग्न देखिएका छन्। “सामुदायिक वनका पदाधिकारीहरू अहिले फरार छन्, खोजी कार्य भइरहेको छ, दोषीलाई कानुनअनुसार कारबाही हुन्छ,” ठाकुरले पत्रकार सम्मेलनमा बताए।
वन अधिकृत ठाकुरको नेतृत्वमा खटिएको टोलीले त्रिवेणी र झरना सामुदायिक वनभित्र लुकाइराखिएको अवस्थामा २८७.५३ क्युफिट चिरान गरिएको सालको काठ बरामद गरेको छ। यसैगरी चुरे गाउँपालिका–५ मौरीबाट २३० थान चिरान गरिएको ९१४९.९८ क्युफिट काठ र सलानीबाट ११८ थान चिरान गरिएको ९६८.६६ क्युफिट काठ फेला परेको छ। दुवै स्थानका सामुदायिक वन उपभोक्ता समूहलाई कार्यालयले स्पष्टीकरण सोध्दै पत्राचार गरेको जनाएको छ।
डिभिजन वन कार्यालयका अनुसार चुरे क्षेत्रमा काठ तस्करीसँगै चोरीसिकार र वन अतिक्रमणसमेत बढ्दो छ। चोरीसिकारका प्रत्यक्ष प्रमाण भने हालसम्म फेला नपरेको कार्यालयले जनाएको छ। अतिक्रमण नियन्त्रणका लागि कार्ययोजनाअनुसार काम भइरहेको जनाइएको छ।
यसैबीच गौरीगङ्गा नगरपालिका–६ स्थित बाह्रवन साझेदारी वनबाट ३३ थान खयर जातको ९२५.२८ क्युफिट काठ बरामद गरिएको छ। खयरसहित गोदावरी नगरपालिका–७ का दुई जनालाई पक्राउ गरी उनीहरूमाथि मुद्दा दायर गरिएको डिभिजन वन कार्यालयले जानकारी दिएको छ।
