बैतडी — बैतडीमा भएको जिप दुर्घटनामा परी मृत्यु भएका तीन जनाको मृत्यु भएको छ। सोमबार बिहान भएको दुर्घटनामा सिगास गाउँपालिका–१ का २४ वर्षीय निशान्त बोहरा, सोही स्थानका २९ वर्षीय भानदेव भट्ट र डडेल्धुराको आलिताल गाउँपालिका–३ का १३ वर्षीय राकेश रावलको घटनास्थलमै मृत्यु भएको जिल्ला प्रहरी कार्यालय बैतडीले जनाएको छ।
प्रहरी प्रवक्ता तथा प्रहरी निरीक्षक सुरज सिंहका अनुसार बैतडीको सुर्नया गाउँपालिका–६ मोतीनगरबाट डडेल्धुरातर्फ जाँदै गरेको म १ ज २२४ नम्बरको बोलेरो जिप जयपृथ्वीराजमार्ग अन्तर्गत पाटन नगरपालिका–८ साँडीघाटी नजिक सोमबार बिहान करिब साढे १० बजे दुर्घटनामा परेको हो।
जिप आफैं अनियन्त्रित भई सडकबाट करिब ३ सय मिटर तल खसेको प्रहरीले जनाएको छ। दुर्घटनामा जिपमा सवार अन्य यात्रुहरू घाइते भएका छन् भने घाइतेको यकिन संख्या खुल्न बाँकी रहेको छ। घाइतेहरूलाई उपचारका लागि डडेल्धुरा अस्पताल पठाइएको प्रहरीले जानकारी दिएको छ।
घटनाबारे थप अनुसन्धान भइरहेको जिल्ला प्रहरी कार्यालय बैतडीले जनाएको छ।
