बाजुरा — बाजुराको बडीमालिका नगरपालिका–६ मा रहेको वीरे खोला बस्ती बुढीगङ्गा खोलाको कटानको उच्च जोखिममा पर्दै आएको छ। २०७७ साल साउन २८ गते बुढीगङ्गा खोलामा आएको बाढीले बस्ती आसपासको भूभाग कटान गरेपछि यहाँका स्थानीय निरन्तर जोखिममा बस्न बाध्य छन्।
उक्त बस्तीमा हाल करिब ४० घरपरिवारको बसोबास रहेको छ। खड्का र साउद समुदायका परिवार बसोबास गर्दै आएका यस बस्तीमा अने साउद, लालसिंह साउद, विक्रम साउद, दाने साउद, लालबहादुर खड्का, प्रभाते खड्का र बिर्ख खड्काका परिवार बढी जोखिममा रहेको स्थानीयले बताएका छन्।
स्थानीय लालबहादुर खड्काका अनुसार २०७७ सालको बाढीपछि खोलाले दुवैतर्फ कटान गर्न थालेसँगै अहिले पूरै बस्ती नै जोखिममा परेको छ। “हाम्रो मुख्य समस्या बस्ती जोगाउने हो, यसका लागि धेरै ठाउँमा पहल गर्यौँ, तर अहिलेसम्म कतैबाट सुनुवाइ भएको छैन,” उनले भने।
यसअघि बस्ती संरक्षणका लागि करिब १० लाख रुपैयाँ लागतमा ग्याबिन जाली लगाइएको भए पनि २०७७ सालकै बाढीले ती संरचना बगाएपछि जोखिम अझ बढेको बडीमालिका नगरपालिका–६ का वडाध्यक्ष कृष्णबहादुर खड्काले जानकारी दिए। उनका अनुसार हाल कुनै स्थायी संरक्षण संरचना नहुँदा बस्ती पूरै असुरक्षित बनेको छ।
जिल्ला विपद् व्यवस्थापन संयोजक तथा प्रमुख जिल्ला अधिकारी डोरेन्द्र निरौलाले बाजुरामा करिब १३५ बस्ती खोलाको कटान, बाढी र पहिरोको जोखिममा रहेको बताए। बस्ती बस्न अयोग्य ठहर भएपछि मात्रै स्थानान्तरण प्रक्रिया अघि बढाइने उनले स्पष्ट पारे।
स्थानीयवासीले समयमै सुरक्षित उपाय नअपनाइए बस्ती विस्थापनको जोखिम बढ्ने भन्दै सम्बन्धित निकायको ध्यानाकर्षण गराएका छन्।
