कञ्चनपुर /सुदूरपश्चिम प्रदेशमा पछिल्लो समय रेबिज सङ्क्रमण तीव्र रूपमा बढ्दै गएको छ। जङ्गली स्याल र भुस्याहा कुकुरको टोकाइबाट पशु तथा मानिसमा रेबिज फैलिन थालेपछि जनस्वास्थ्यमा जोखिम थपिएको सरोकारवालाले बताएका छन्।
धनगढीस्थित पशुपन्छी रोग अन्वेषण प्रयोगशालाका अनुसार पछिल्लो २० दिनमा मात्रै कम्तीमा १८ पशुको रेबिजका कारण मृत्यु भएको छ। पछिल्ला तीन वर्षमा प्रदेशभर ३ सयभन्दा बढी पशुमा रेबिज पुष्टि भइसकेको छ भने यस अवधिमा केही मानिसको पनि रेबिजकै कारण ज्यान गएको जानकारी आएको छ।
सबैभन्दा बढी सङ्क्रमण कैलाली र कञ्चनपुर जिल्लामा देखिएको छ। उखुखेती कटानीका कारण जङ्गली जनावरको बासस्थान नष्ट हुँदा स्याल मानव बस्तीमा पस्ने र घरपालुवा जनावरलाई टोक्ने घटनाले रेबिज फैलिएको जनाइएको छ।
चिकित्सकहरूले रेबिज शतप्रतिशत प्राणघातक रोग भए पनि समयमै सावधानी अपनाएमा ज्यान जोगाउन सकिने बताएका छन्। कुनै पनि पशुले टोकेमा घाउ साबुन र सफा पानीले राम्ररी धुने, ढिलाइ नगरी स्वास्थ्य संस्थामा पुगेर रेबिजविरुद्धको खोप लगाउन र घरपालुवा जनावरलाई अनिवार्य खोप दिन आग्रह गरिएको छ ।