काठमाडौं — देशभर पश्चिमी वायुको आंशिक प्रभाव रहेको मौसम पूर्वानुमान महाशाखाले जनाएको छ। हाल तराईका धेरै स्थानमा हुस्सु लागेको छ भने कोशी, बागमती र गण्डकी प्रदेशका पहाडी तथा हिमाली भू–भागमा आंशिक बदली रहेको छ।
महाशाखाका अनुसार आज दिउँसो तराईका अधिकांश स्थानमा हुस्सु यथावत् रहनेछ। कोशी, मधेस र बागमती प्रदेशका तराई क्षेत्रमा बिहान केही समय कुहिरो लाग्ने सम्भावना छ भने बाँकी तराई भू–भागमा मध्यान्हसम्म कुहिरो देखिन सक्ने अनुमान गरिएको छ। गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू–भागमा आंशिक बदली रहनेछ।
आज राति पनि तराईका अधिकांश स्थानमा हुस्सु कायम रहने तथा सबै प्रदेशका पहाडी र हिमाली क्षेत्रमा आंशिक बदलीको अवस्था रहने मौसम पूर्वानुमान महाशाखाले जनाएको छ।
महाशाखाले तराई क्षेत्रमा हुस्सु र कुहिरोका कारण बिहानको समयमा जनजीवन, स्वास्थ्य, सडक तथा हवाई यातायात प्रभावित हुन सक्ने भन्दै आवश्यक सतर्कता अपनाउन सर्वसाधारणलाई अनुरोध गरेको छ।
