कैलाली — गोदावरी नगरपालिका–२ मा रहेको दुर्गालक्ष्मी महिला सामुदायिक वनमा पदाधिकारी र स्थानीय ठेकेदारको मिलेमत्तोमा व्यापक रूपमा माटो उत्खनन हुँदै आएको खुलेको छ।
स्थानीयवासीका अनुसार सामुदायिक वनभित्र स्काभेटर प्रयोग गरेर ठूलो मात्रामा माटो खनिने र टिप्परमार्फत बाहिर सारिने काम धमाधम भइरहेको छ। वन संरक्षणको जिम्मा पाएको उपभोक्ता समितिका वरिष्ठ पदाधिकारी नै उत्खननमा संलग्न रहेको आरोप स्थानीयले लगाएका छन्।
सब–डिभिजन वन कार्यालय गोदावरीका प्रमुख, वरिष्ठ वन अधिकृत कृष्णबहादुर बोहरा,ले आफूलाई घटनाबारे कुनै जानकारी नभएको दाबी गर्दै सामुदायिक वनको माटो बेचबिखन कानुनी रूपमा समेत प्रतिबन्धित रहेको स्पष्ट पारे।
उपभोक्ता समितिकी अध्यक्ष सिबा कडायतले पनि स्थानीय ठेकेदारलाई माटो उत्खननको अनुमति दिएको स्वीकार गरेकी छन्। उनका अनुसार वनभित्र नर्सरी निर्माणका लागि तारजाली बनाउने शर्तमा ठेकेदारलाई माटो निकाल्न दिएको बताइन्।
तर स्थानीयले यसलाई सजिलो सम्झौता नभई अवैध व्यापार रहेको आरोप लगाउँदै आएका छन्। उनीहरूको भनाइमा करिब दुई महिनादेखि निरन्तर माटो निकालिँदै आएको र रोक्न खोज्दा केही व्यक्तिले धम्कीसमेत दिने गरेका छन्।
स्थानीय लक्ष्मी खत्री र रतनबहादुर थापामगरका अनुसार समितिका पदाधिकारी, जनप्रतिनिधि र केही कर्मचारीको सक्रियतामा माटो बेचेर लाखौँ रुपैयाँ राजस्व हिनामिना भएको छ। उनीहरूको अनुमानमा अहिलेसम्म ठूलो परिमाणमा माटो बिक्री भइसकेको छ।
माटो उत्खननका कारण सामुदायिक वनभित्र गहिरा खाल्डा बनेका छन्। स्थानीयले संलग्न व्यक्ति तथा ठेकेदारमाथि कानुनी कारबाही गरी उत्खनन तुरुन्त रोक्न माग गरेका छन्। अहिले बजारमा एक टिप्पर माटोको मूल्य चारदेखि पाँच हजार रुपैयाँ पर्ने गरेको बताइन्छ।
