काठमाडौं /नेपाल प्रिमियर लिग (एनपिएल) अन्तर्गत बुधबारको खेलमा लुम्बिनी लायन्सले विराटनगर किंग्सलाई ५ विकेटले पराजित गर्दै प्रतियोगिताको चौथो स्थानमा उक्लिएको छ। यस जितसँगै लुम्बिनीले प्लेअफमा पुग्ने सम्भावना पनि कायम राखेको छ।
१४५ रनको लक्ष्य पछ्याएका लुम्बिनीका लागि डार्सी सर्ट उत्कृष्ट रहे। उनले ४४ बलमा ४ चौका र २ छक्कासहित ५७ रन जोड्दै टोलीलाई जितको आधार तयार पारे। त्यस्तै निरोशन डिक्वालाले २९, सन्दीप जोराले २४ र दिलीप नाथले १६ रन थपे। लुम्बिनीले १७ ओभर ४ बलमै ५ विकेट गुमाउँदै लक्ष्य भेट्टायो।
बलिङतर्फ विराटनगरका कप्तान सन्दीप लामिछाने र सुबास भण्डारीले दुई–दुई विकेट लिए भने बसिर अहमदले एक विकेट हात पारे।
यसअघि टस जितेर पहिला ब्याटिङ गरेको विराटनगरले निर्धारित २० ओभरमा ८ विकेट गुमाएर १४४ रन बनाएको थियो। विराटनगरका लागि बसिर अहमदले १९ बलमा २८ रन, लोकेश बमले ४२ बलमा ३५ रन र साम हेजलेटले २० बलमा २७ रनको योगदान दिए।
लुम्बिनीका बलर शेर मल्ल खेलका सर्वाधिक प्रभावकारी बलर बने, उनले ३ विकेट लिए। त्यस्तै जेजे स्मिथ, अभिशेष गौतम र रुबेन ट्रम्पलम्यानले एक–एक विकेट लिन सफल भए।
