काठमाडौं /विनोद भण्डारीको उत्कृष्ट ब्याटिङले सुदूरपश्चिम रोयल्सले सिद्धार्थ बैंक एनपीएलमा लगातार चौथो जीत दर्ता गरेको छ। कीर्तिपुरको त्रिवि क्रिकेट मैदानमा शुक्रबार लुम्बिनी लायन्सलाई ७ विकेटले हराउँदै सुदूरपश्चिम अंकतालिकाको शीर्ष स्थान मजबुत बनाउन सफल भयो।
लुम्बिनीले दिएको १४४ रनको लक्ष्य सुदूरपश्चिमले १८.२ ओभरमै तीन विकेटको क्षतिमा पूरा गर्यो। भण्डारीले ४९ बलमा अविजित ६९ रन (५ चौका, ४ छक्का) प्रहार गर्दै जितको आधार तयार गरे। यो उनको चालु संस्करणको पहिलो अर्धशतक हो।
सहयोगी ब्याट्सम्यानमध्ये आरिफ शेखले ३९ रन, क्रिस्ट लिनले १९ रन जोडे। चार खेलबाट ८ अंक बनाएको सुदूरपश्चिम एक जीत थप गरे प्लेअफमा प्रवेश पक्का हुनेछ।
पहिलो खेलमै धमाकेदार सुरुवात गरेको लुम्बिनी भने लगातार तेस्रो हारसँगै दबाबमा परेको छ। ४ खेलपछि उसले जम्मा २ अंक मात्र जोडेको छ।
लुम्बिनीका लागि रुबेन ट्रम्पलम्यान, अभिशेष गौतम र तिलक भण्डारीले एक–एक विकेट निकाले।
