बाजुरा–बुढीगङ्गा नगरपालिका–४ खातीगाउँका कृष्णबहादुर खातीले स्थानीय स्रोतबाट अचार उत्पादन गर्दै पछिल्ला वर्षमा राम्रो आम्दानी गर्न थालेका छन्।
गाउँमै उत्पादन हुने अकबरे खुर्सानी, मुला, कागती, चुक, इमिलो तथा लोकल कुखुराको मासु प्रयोग गरी २० भन्दा बढी प्रकारका अचार बनाउने खातीले हालै मात्र बाम्का बजारमा करिब नौ हजार रूपैयाँ बराबरको अचार बिक्री भएको बताए।
उनका अनुसार गाउँका उत्पादनबाट बनेको अचार काठमाडौंसम्म माग बढ्दै गएको छ। काठमाडौंमा बसोबास गर्ने स्थानीयहरूले गाउँको स्वाद खोज्ने भएकाले माग बढेको खातीको भनाइ छ।
कृषक खाती तरकारी तथा मसला खेती पनि गर्छन्। आफ्नै बारीमा उत्पादन हुने कागती, मुला, आँप, अकबरे खुर्सानी, धनियाँ, लसुन आदि प्रयोग गर्दा अचार स्वास्थ्यका लागि पनि उत्तम हुने भएकाले बजारको अचारभन्दा लोकप्रिय भएको उनको दाबी छ।
उहाँका अनुसार अचार बिक्रीबाट वार्षिक करिब एक लाख रुपैयाँसम्म बचत हुने गरेको छ।
