काठमाडौँ । नेपाल प्रिमियर लिग (एनपीएल) क्रिकेटमा आज दुई रोचक खेल हुँदैछन्। पहिलो खेलमा जनकपुर बोल्ट्स र विराटनगर किङ्स, दोस्रो खेलमा सुदूरपश्चिम रोयल्स र कर्णाली याक्स प्रतिस्पर्धा गर्नेछन्।
पहिलो खेल विहान पौने १२ बजे सुरु हुनेछ, जहाँ लगातार दुई खेलमा विजयी रहेको विराटनगर तेस्रो जितका खोजीमा मैदान उत्रनेछ। आफ्नो पहिलो खेलमा पराजित जनकपुर भने आजको खेलमार्फत उत्कृष्ट पुनरागमनको प्रयास गर्नेछ।
दोस्रो खेल अपरान्ह ४ बजेदेखि हुनेछ। कर्णालीले तीस्रो खेल खेल्दै दोस्रो जित निकाल्ने उद्देश्य राखेको छ, भने पहिलो दुई खेलमा विजयी सुदूरपश्चिम अपराजित यात्रा जारी राख्ने लक्ष्यमा छ।
पहिलो संस्करणमा सुदूरपश्चिमले कर्णालीलाई ६ विकेटले पराजित गरेको थियो।
यससँगै एनपीएलका ८ खेल सकिँदा काठमाडौँ गोर्खाजले ३ खेल पूरा गरिसकेको छ भने जनकपुरले १ र अन्य सबै टोलीले २–२ खेल खेलेका छन्।
फ्लड लाइट र प्यारापिटमा पहिलोपटक भइरहेको एनपीएलले नेपाली क्रिकेटमा उत्साह थपिएको छ।
हालसम्म सुदूरपश्चिम रोयल्स र विराटनगर किङ्स दुवै अपराजित छन्। समान ४ अंक भए पनि नेट रन रेटका आधारमा विराटनगर शीर्ष स्थानमा रहेको छ। जनकपुरले १ खेल खेलेको छ भने पोखरा एभेन्जर्सले २ खेल खेले पनि अहिलेसम्म जित दर्ता गर्न सकेको छैन।
