काठमाडौँ । नेपाल प्रिमियर लिग (एनपीएल) को दोस्रो संस्करण अन्तर्गतको सातौँ खेलमा कर्णाली याक्सले उत्कृष्ट जित निकाल्दै प्रतियोगितामा पहिलो विजय दर्ता गरेको छ। लुम्बिनी लायन्सलाई ९ विकेटले पराजित गर्दै कर्णालीले महत्त्वपूर्ण अंक जोडेको हो।
किर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर १५७ रनको लक्ष्य पाएको कर्णालीले १२.२ ओभरमै १ wicket गुमाएर सहजै लक्ष्य पूरा गर्यो।
कर्णालीका मार्क वाट उत्कृष्ट फर्ममा रहे। उनले ४४ बलमा ११४ अविजित रन प्रहार गर्दै टोलीलाई विजयी मार्ग देखाए। वाटको पारीमा ६ चौका र १२ छक्का समावेश थिए। विलियम बासिस्टोले पनि २९ अविजित रन जोड्दै दोस्रो विकेटका लागि १२३ रनको साझेदारी गरे।
कर्णालीले पहिलो विकेटको रूपमा प्रियांक पञ्चाललाई गुमाएको थियो। उनले १२ रन बनाएका थिए।
लुम्बिनीका शेर मल्लले मात्र एक विकेट लिन सके।
यसअघि, टस हारेर ब्याटिङ गरेको लुम्बिनीले २० ओभरमा ८ विकेटका क्षतिमा १५६ रन बनाएको थियो। कप्तान रोहित पौडेलले ४९ रनको पारी खेले। डार्सी सर्टले १९, जे जे स्मिथले २३, र रुबिन ट्रम्पलमेनले २९ रन जोडे।
कर्णालीका नन्दन यादवले २ विकेट लिए भने सोमपाल कामी, विलियम बासिस्टो, गुल्सन झा, मार्क वाट, विपिन शर्मा र युवराज खत्रीले एक–एक विकेट हात पारे।
कर्णालीले पहिलो खेलमा चितवनसँग हार बेहोरेको थियो। लुम्बिनी भने पहिलो खेलमा चितवनलाई पराजित गरेको थियो।
आजको दोस्रो खेलमा काठमान्डु गोर्खाज र विराटनगर किङ्स आमनेसामने हुँदैछन्।
