काठमाडौँ । सिद्धार्थ बैंक नेपाल प्रिमियर लिग (एनपीएल) क्रिकेटमा आज ‘सुपर स्याटर्डे’ का रूपमा दुई आकर्षक खेलहरू निर्धारित भएका छन्।
बिहान सवा ११ बजे हुने पहिलो खेलमा कर्णाली याक्स र लुम्बिनी लायन्स आमनेसामने हुँदैछन्। पहिलो खेलमा चितवन राइनोजसँग पराजित कर्णाली पहिलो जितको खोजीमा छ भने चितवनलाई हराएर राम्रो सुरुआत गरेको लुम्बिनी लगातार दोस्रो जितको लक्ष्यसहित मैदानमा उत्रनेछ। गत संस्करणमा कर्णालीले लुम्बिनीलाई ५ रनले हराएको थियो।
आजको दोस्रो खेल अपरान्ह साढे ३ बजे सुरु हुनेछ, जहाँ काठमान्डु गोर्खाज र विराटनगर किङ्स भिड्नेछन्। काठमान्डुले यसअघि दुई खेल खेलेको छ—पहिलो खेलमा जनकपुर बोल्ट्सलाई हराए पनि दोस्रोमा सुदूरपश्चिम रोयल्ससँग पराजित भएको थियो। विराटनगरका लागि भने आज दोस्रो खेल हो। पहिलो खेलमा उसले पोखरा एभेन्जर्सलाई सहजै हराएको थियो।
गत संस्करणमा काठमान्डुले विराटनगरविरुद्ध १ विकेटले रोमाञ्चक जित हात पारेको थियो।
अंक तालिकामा सुदूरपश्चिम रोयल्स २ खेलमा २ जितसहित ४ अंक बटुलेर शीर्षस्थानी छ। १–१ जित हात पारेका विराटनगर, लुम्बिनी, चितवन र काठमान्डु क्रमशः दोस्रोदेखि पाँचौँ स्थानमा रहेका छन्।
