काठमाडौं,नेपाली प्रिमियर लिग (एनपीएल) को दोस्रो संस्करणमा काठमान्डू गोर्खाजले उत्कृष्ट सुरुआत गरेको छ। सोमबार कीर्तिपुरस्थित त्रिवि क्रिकेट मैदानमा भएको उद्घाटन खेलमा काठमान्डूले गत संस्करणको विजेता जनकपुर बोल्ट्सलाई ६ विकेटले पराजित गर्दै पहिलो जित दर्ता गर्यो।
जनकपुरले प्रस्तुत गरेको १३१ रनको लक्ष्य काठमान्डूले १८ ओभरमै पाँच विकेट गुमाउँदै पार गर्यो। यससँगै पहिलो संस्करणमा जनकपुरसँग भोगेको पराजयको बदला लिँदै काठमान्डूले अंकतालिकामा २ अंक जोड्यो।
काठमान्डूका लागि बेन चार्ल्सवर्थले सर्वाधिक ४६ रनको द्रुत खेल खेले। २३ बलमा ५ चौका र ३ छक्का प्रहार गर्दै उनले टोलीलाई जितको आधार बनाइदिए। ओपनर आकाश त्रिपाठीसँग उनले पहिलो विकेटका लागि ७० रनको साझेदारी गरे। आकाशले ३९ रन जोड्दा काठमान्डूले सुरुवाती चरणमै खेल नियन्त्रणमा लिएको थियो।
भीम सार्की ३ रनमा, जबकि मिलिन्द कुमार १९ रनमा आउट भए।
जनकपुरतर्फ ललितनारायण राजवंशी र जोन निकोल लोफ्टी–इटनले एक–एक विकेट लिएका थिए।
जनकपुरको इनिङ्स
टस गुमेर पहिला ब्याटिङ गरेको जनकपुरले निर्धारित २० ओभरमा ६ विकेटको क्षतिमा १३० रन बनाएको थियो। टोलीका ओपनर आसिफ शेखले ५४ रनको पारी खेल्दै दोस्रो संस्करणको पहिलो अर्धशतकका मालिक बने। ६ चौका र १ छक्का समावेश रहेको उनको प्रदर्शना उत्कृष्ट भए पनि मध्यक्रमले साथ नदिँदा जनकपुर दबाबमा परेको थियो।
पछिल्लो क्रममा मयन यादवले ३४ रनको योगदान दिएर स्कोर उकासे। काठमान्डूका बलर मिलिन्द कुमारले प्रभावकारी प्रदर्शन गर्दै ४ ओभरमा मात्र १५ रन खर्चेर महत्वपूर्ण ३ विकेट झारे। शहाब आलम र सन्तोष यादवले एक–एक विकेट लिन सफल भए।
