बैतडी, कात्तिक २८
बैतडीको पाटन नगरपालिका–६ का चालक बिरभान बिष्टको हत्यामा संलग्न चार जनालाई जिल्ला अदालत बैतडीले जन्मकैदको फैसला सुनाएको छ।

जिल्ला अदालतका श्रेस्तेदार विष्णुराज पन्तका अनुसार २०८१ असार १ गते चालक बिष्टको हत्या गरेको प्रमाणित भएपछि अदालतले बुधबार फैसला सुनाएको हो।

जन्मकैद पाउनेमध्ये मृतक बिष्टकी बुहारीसमेत रहेकी भागरथी बिष्ट, पाटन–६ का ३८ वर्षीय भरतमोहन बिष्ट, पाटन–१ का १९ वर्षीय राजेन्द्र भट्टराई र पाटन–६ का २६ वर्षीय आशिष प्रहरी रहेका छन्।

यससँगै हत्यामा संलग्न भई पक्राउ परेका १८ वर्षमुनिका एक किशोरलाई भने १६ वर्ष कैद सजाय तय गरिएको अदालतले जनाएको छ।

२०८१ असार १ गते भागरथी बिष्टको घरमै चालक बिरभानको हत्या गरी लुकाइ राखिएको थियो। त्यसको दुई दिनपछि पाटन–पञ्चेश्वर सडकखण्डस्थित घङाल खोलामा शव फालिएको थियो। असार ३ गते स्थानीयले सोही स्थानमा शव देखेपछि प्रहरीको टोलीले थप अनुसन्धान अघि बढाएको थियो।

घटनामा संलग्न पाँचै जनाविरुद्ध २०८१ असार २३ गते थुनछेक बहस सम्पन्न भएपछि सबैलाई पुर्वपक्षका लागि कारागार चलान गरिएको थियो। लामो प्रक्रियापछि असार २६ गते अदालतले चार जनालाई जन्मकैद र एक किशोरलाई १६ वर्ष कैदको सजाय सुनाएको हो।