सिलगढी,असोज १९ – हाल बङ्गालको खाडीबाट आएको जलवाष्पयुक्त मनसुनी वायुको प्रभाव देशभर सक्रिय रहेको छ। यस कारण आज नेपालका अधिकांश स्थानमा बदली र वर्षाको सम्भावना देखिएको जल तथा मौसम विज्ञान विभाग, मौसम पूर्वानुमान महाशाखाले जनाएको छ।
महाशाखाका अनुसार कोशी र मधेस प्रदेशका धेरैजसो क्षेत्रमा पूर्ण बदली रहनेछ भने बागमती र लुम्बिनी प्रदेशमा सामान्य बदली रहने बताइएको छ। बाँकी भू–भागहरूमा आंशिक बदलीको स्थिति रहनेछ।
कोशी र मधेस प्रदेशका धेरै स्थानमा, साथै अन्य प्रदेशका पहाडी र तराईका केही भागहरूमा मेघगर्जन तथा चट्याङसहित मध्यम वर्षा हुने अनुमान गरिएको छ। त्यस्तै, कोशी र मधेस प्रदेशका एक–दुई स्थानमा भारी वर्षा पर्ने सम्भावना रहेको पनि विभागले चेतावनी दिएको छ।
महाशाखाले सावधानी अपनाउन सबैलाई आग्रह गर्दै भनेको छ, “आज कोशी, मधेस र बागमती प्रदेशसँगै देशका पहाडी भू–भागहरूमा मध्यमदेखि भारी वर्षाको सम्भावना छ, अतः वर्षाजन्य जोखिमबाट सचेत रहनु आवश्यक छ।”
