डोटी, असोज १२ ।
डोटीको पूर्वीचौकी गाउँपालिका–२ हुणेखोला स्थित सिलगढी–झिग्राना सडक खण्डमा आइतबार दिउँसो पहिरो खस्दा एक जना बालिका बेपत्ता र तीन जना घाइते भएका छन्।
जिल्ला प्रहरी कार्यालय डोटीका अनुसार आइतबार दिउँसो करिब २:४० बजे घरतर्फ पैदल हिँडिरहेका बेला माथिबाट आएको पहिरोले जिल्लाकाे सायल गाउँपालिका–४ भाल्माका प्रेम विष्टकी २६ वर्षीया श्रीमती महेश्वरी विष्ट र उनका तीन सन्तानलाई च्यापेको हो।
उक्त घटनामा महेश्वरी विष्ट घाइते भएकी छन्। उनको शरीरको विभिन्न भागमा चोट लागेको र अवस्था मध्यम रहेको जिल्ला प्रहरी कार्यालय डाेटीले जनाएको छ ।
त्यस्तै उनकी छोरी ५ वर्षीया भगवती विष्ट पहिरोमा बेपत्ता भएकी छन्।
यसैगरी उनका छोरा ७ वर्षीय सबिन विष्ट सामान्य घाइते भएका छन् भने ९ वर्षीया करिष्मा विष्ट पनि सामान्य चोट लागेकी छन्। घाइतेहरुको जिल्ला अस्पताल डोटीमा उपचार भइरहेको छ।
घटनापछि प्रहरी निरीक्षक नवराज रावलको नेतृत्वमा १५ जनाको टोली परिचालन गरी खोजतलास तथा उद्धार कार्य भइरहेको जिल्ला प्रहरी कार्यालय डोटीका प्रहरी प्रमुख महेन्द्र नेपालले बताए ।
प्रतिक्रिया
सम्बन्धित खवर
