सिलगढी – मौसम पूर्वानुमान महाशाखाले आज देशभर साधारणतया बदली रहने र अधिकांश स्थानमा वर्षा हुने सम्भावना रहेको जनाएको छ। विशेषगरी कोशी, बागमती र गण्डकी प्रदेशका पहाडी भू-भागमा भारी वर्षा हुने चेतावनी दिइएको छ।

महाशाखाका अनुसार, दिउँसो कोशी, मधेश, बागमती र गण्डकी प्रदेशका केही स्थानमा मध्यम वर्षा हुने अपेक्षा गरिएको छ। त्यस्तै, लुम्बिनी प्रदेश, अन्य पहाडी क्षेत्रका थोरै स्थानमा र तराईका एक-दुई स्थानमा समेत वर्षा हुनसक्छ।

आज राति देशका पहाडी भू-भागमा सामान्यतया बदली रहनेछ भने बाँकी क्षेत्रमा आंशिक बदली हुनेछ। गण्डकी, लुम्बिनी र कर्णाली प्रदेशका पहाडी भू-भागका केही स्थानमा तथा तराईका केही स्थानमा मध्यम वर्षाको सम्भावना रहेको महाशाखाले जनाएको छ।

भारी वर्षा हुने सम्भावना भएकाले पहाडी क्षेत्रमा पहिरो र आकस्मिक बाढीको जोखिम उच्च हुने चेतावनी दिँदै महाशाखाले आवश्यक सतर्कता अपनाउन सबैलाई अनुरोध गरेको छ।