कैलाली /सुदूरपश्चिम प्रदेशका विभिन्न कारागारमा जेनजी आन्दोलनका बेला भएको तोडफोड र अराजकताको फाइदा उठाउँदै ठूलो संख्यामा कैदीबन्दीहरू फरार भएका थिए। प्रदेश प्रहरीका अनुसार १ हजार ४ सय ५८ जना कैदी फरार भएका थिए, जसमा अहिलेसम्म ८४५ जना मात्रै कारागार फर्किएका छन्। बाँकी ६ सय १३ जना अझै सम्पर्कमा आएका छैनन्।
फरार भएका कैदीमध्ये लागूऔषध, हातहतियार, चोरी जस्ता गम्भीर अपराधमा सजाय काटिरहेका कैदीहरू पनि छन्। विशेषगरी कैलाली र कञ्चनपुरका कारागारबाट भागेका २१ भारतीय कैदीमध्ये २० जना अझै पक्राउ परेका छैनन्। कैलाली कारागारमा मात्र एकजना भारतीय कैदी फर्किएका छन्।
प्रदेश प्रहरीले आशंका व्यक्त गरेको छ कि फरार कैदीहरू भारततर्फ भागेको हुनसक्छ। सीमा क्षेत्रमा निगरानी बढाइएको छ भने खोजीका लागि भारतीय प्रहरीले पनि सहयोग गरिरहेको छ। प्रहरीले सर्वसाधारणलाई फरार कैदी देखेमा तुरुन्तै जानकारी दिन आग्रह गरेको छ।
त्रासको वातावरण सुरुमा भए पनि केही कैदी फर्किएपछि स्थिति क्रमशः सामान्य बन्दै गएको छ।
