कैलाली /धनगढी उपमहानगरपालिका–८ मा रहेको धनगढी सभागृह, जुन तीन वर्षअघि निर्माण भएको थियो, जेनजी समूहको आन्दोलनका क्रममा भदौ २४ गते भएको तोडफोडपछि सञ्चालनमा आउन सकेको छैन।
वडाध्यक्ष जुगराम चौधरीका अनुसार आन्दोलनकारीले सभागृहको सिसादेखि भित्रको संरचना, कुर्सी र अन्य सामग्री तोडफोड गरेका छन्। निजी सुरक्षाकर्मीका अनुसार आन्दोलनकारीले आगजनीसमेत गरेका थिए, जसमा दुई कुर्सी जलेका छन्, तर अन्य भागमा क्षति हुन सकेको छैन।
सभागृह ठूलो गोष्ठी, सेमिनार र कार्यक्रम आयोजना गर्नका लागि संघीय सरकारले ३२ करोड ६० लाख ८१ हजार रुपैयाँ लगानीमा निर्माण गरेको हो। गत फागुनमा तत्कालीन प्रधानमन्त्री केपी शर्मा ओलीले उद्घाटन गरेका थिए।
सभागृहमा ७५३ जना अटाउने मुख्य सभा हल, २०० क्षमताको सानो हल, अन्डरग्राउन्ड पार्किङ, भिआइपी कक्ष र चेन्जिङ कक्ष रहेका छन्। सुदूरपश्चिम प्रदेश सरकारले आगामी मङ्सिरमा प्रदेश लगानी तथा विकास सम्मेलन यही सभागृहमा गर्ने तयारी गरेको थियो।
तोडफोडपछि मुख्यमन्त्री कमलबहादुर शाहले सभागृहको अनुगमन समेत गर्नुभएको छ।
