सिलगढी,
मनसुनको न्यूनचापीय रेखा सरदर स्थान वरिपरि रहेकाले र अरब सागर तथा बंगालको खाडीबाट आएको जलवाष्पयुक्त हावाको प्रभावले देशभर मनसुनी गतिविधि सक्रिय भएको छ। मौसम पूर्वानुमान महाशाखाका अनुसार आज देशभर आंशिकदेखि पूर्ण बदली रहनेछ।
दिउँसो पहाडी र तराईका केही क्षेत्रमा मध्यम वर्षा हुने देखिएको छ। गण्डकी, लुम्बिनी र कर्णालीका थोरै स्थानमा तथा कोशी र बागमतीका एक–दुई स्थानमा ठूलो वर्षा पर्न सक्ने अनुमान छ। विशेषगरी गण्डकी र लुम्बिनीका केही भागमा धेरै भारी वर्षा हुने सम्भावना रहेकाले सतर्कता अपनाउन महाशाखाले आग्रह गरेको छ।
राति पनि अधिकांश स्थानमा बादल रहने र लुम्बिनी, गण्डकी, कर्णालीसहित देशका विभिन्न भू–भागमा वर्षा जारी रहने अनुमान गरिएको छ। गण्डकी र लुम्बिनी प्रदेशका एक–दुई स्थानमा अत्यधिक वर्षा भई बाढी, पहिरो र डुबानको जोखिम बढ्ने चेतावनी दिइएको छ।
महाशाखाले जोखिमयुक्त क्षेत्रमा बसोबास गर्नेलाई सतर्क रहन, यात्रा गर्दा आवश्यक तयारी गर्न र मौसमसम्बन्धी ताजा जानकारीका लागि आफ्नो वेबसाइट तथा सञ्चारमाध्यममार्फत अपडेट लिन अनुरोध गरेको छ।
