काठमाडौ /पूर्वप्रधानन्यायाधीश सुशीला कार्कीलाई अन्तरिम सरकारको नेतृत्व गर्ने सहमति भएको छ। सहमति अनुसार राष्ट्रपति रामचन्द्र पौडेलले उनलाई शुक्रबार बिहानै नियुक्ति गरी शपथ गराउने तयारी भएको राष्ट्रपति कार्यालयले जनाएको छ।

राष्ट्रपतिका प्रेस विज्ञ किरण पोखरेलका अनुसार शपथग्रहण समारोह बिहान ९ बजे शीतलनिवासमा हुने तय भएको छ। यसअघि कार्कीसहितको टोली राष्ट्रपति निवासमा पुगेर अन्तिम छलफल सम्पन्न भएको थियो।

छलफलमा कार्कीसँगै जेनजी आन्दोलनका अभियन्ता तथा ‘हामी नेपाल संस्थाका’ अध्यक्ष सुदन गुरुङ र अधिवक्ता ओमप्रकाश अर्याल सहभागी थिए।

यद्यपि संसद् विघटनको प्रश्नमा भने सहमति जुट्न सकेको छैन। दुवै पक्ष आ–आफ्नो अडानमा अड्किँदा त्यसबारे टुंगो नलागेको बताइएको छ। पोखरेलका अनुसार कार्कीको औपचारिक नियुक्तिपछि संसद् विघटनसम्बन्धी निर्णयबारे थप प्रष्टता आउनेछ।

यसअघि जेनजी आन्दोलनको दबाबपछि प्रधानमन्त्री केपी शर्मा ओलीले मंगलबार राजीनामा दिएका थिए। असामान्य राजनीतिक परिस्थितिलाई मध्यनजर गर्दै राष्ट्रपति पौडेलले सोही दिन राजीनामा स्वीकृत गरेका थिए।