सिलगढी /जेनजी आन्दोलनको भिडलाई उपयोग गर्दै राष्ट्रिय स्वतन्त्र पार्टीका कार्यकर्ताले सहकारी ठगी मुद्दामा थुनामा रहेका रवि लामिछानेलाई कारागारबाहिर ल्याएको हल्ला फैलिएपछि सुदूरपश्चिमका अधिकांश जिल्लामा कैदीबन्दी भाग्ने लहर चलेको छ।
बाजुरा, अछाम र डोटी कारागारबाहेक प्रदेशका सबै कारागारबाट कैदी भागेका छन्। डोटीस्थित बाल सुधारगृहका बन्दी समेत आन्दोलनकारीको सहयोगमा फरार भएका छन्।
प्रदेशभरका कारागार र सुधारगृहबाट गरी १,३३१ जना कैदीबन्दी बाहिरिएको जनाइएको छ। तीमध्ये ६० जनालाई प्रहरीले पक्राउ गरी पुनः कारागार चलान गरेको छ।
कैलाली कारागारबाट मात्रै ६१२ जना भागेका थिए। हालसम्म दुई जनालाई पक्राउ गरिएको जिल्ला प्रशासन कार्यालयले जनाएको छ। बाँकीको खोजी जारी छ।
त्यस्तै, डडेल्धुरा कारागारबाट भागेकामध्ये ३१ जनालाई पुनः नियन्त्रणमा लिइएको जिल्ला प्रहरी कार्यालय डडेल्धुराले जनाएको छ। मंगलबार ८५ जना कैदी एकैपटक भागेका थिए। बाँकीकै खोजीमा नेपाल प्रहरी र सेनाको संयुक्त टोली खटिएको छ।
बझाङ कारागारबाट ८५ कैदीमध्ये ६६ जना फरार भएका छन्। तीमध्ये पाँच जना पुनः पक्राउ परेका छन्।
अछाम कारागारमा भने बुधवार बिहानै कैदीबन्दीका आफन्त र सुरक्षाकर्मीबीच झडपको स्थिति बनेको थियो। देशभर कैदी छोडिएको भन्दै आफन्तले दबाब दिँदा स्थिति तनावपूर्ण बनेको हो।
बैतडी कारागारबाट पनि मंगलबार साँझ ६२ जना कैदी भागेका छन्। खोजी कार्य जारी रहेको प्रशासनले जनाएको छ।
कञ्चनपुर कारागारमा रहेका ४७६ मध्ये २२ जना मात्र भित्रै बसेका छन्। बाँकी सबै फरार भएका छन्। प्रहरीका अनुसार १३ पुरुष र ९ महिला कैदीले कानुन नउल्लंघन गर्ने भन्दै भाग्न अस्वीकार गरेका हुन्।
यसैगरी, डोटीको बाल सुधारगृहका ५२ जना बालबन्दी समेत फरार भएका छन्। तर डोटी जिल्ला कारागारमा रहेका कैदी भने यथावत रहेको जनाइएको छ।
