बझाङ /बझाङको केदारस्युँ गाउँपालिका–१ देउरामा इलाका प्रशासन कार्यालय स्थापना गर्ने सरकारी निर्णयविरुद्ध केही समूहले स्थान परिवर्तनको प्रयास गरेपछि स्थानीयवासीले कडा आपत्ति जनाएका छन्। देउरावासीले शुक्रबार विरोधसहित गाउँपालिकामार्फत जिल्ला प्रशासन कार्यालय र जिल्ला समन्वय समितिमा ज्ञापनपत्र बुझाउँदै कार्यालय अन्यत्र सार्ने षड्यन्त्र भए कडा आन्दोलनमा उत्रिने चेतावनी दिएका हुन्।
स्थानीयवासीले देउरामा आवश्यक पूर्वाधार—बैंक, अस्पताल, प्रहरी कार्यालय र सरकारी सेवा निकायहरू उपलब्ध रहेको भन्दै कार्यालय यतै हुनुपर्ने तर्क गरेका छन्। आठौं जिल्ला सभाबाट पनि देउरामै स्थापना गर्ने निर्णय भएको उनीहरूको भनाइ छ।
तर, केदारस्युँ–९ झोताका बासिन्दाले कार्यालय झोतामै हुनुपर्ने दाबी गर्दै आएका छन्। उनीहरूका अनुसार पाँचौं, छैटौं र सातौं जिल्ला सभाले झोतामा कार्यालय स्थापना गर्ने निर्णय गरिसकेको छ। उनीहरूले यसै निर्णयलाई कार्यान्वयन गर्न सरकारसँग माग गर्दै विगतमा जिल्ला प्रशासन कार्यालयमै पुगेर ज्ञापनपत्रसमेत बुझाएका थिए।
यसरी झोता र देउरा दुबै स्थानका बासिन्दाले आफ्ना–आफ्ना दाबी प्रस्तुत गरेपछि विषय अझै टुंगो लाग्न सकेको छैन। गृह मन्त्रालयले विवाद समाधानका लागि जिल्ला समन्वय समितिलाई पायक पर्ने स्थान तोक्न भनी १७ भदौमा पत्रसमेत पठाइसकेको छ। समिति जिल्ला सभाबाट निर्णय गरेर सुझाव पठाएपछि मन्त्रिपरिषदको प्रशासन समितिले अन्तिम टुंगो लगाउने बताइएको छ।
