डोटी / विश्वभरी महामारीको रुपमा फैलिएको कोरोना कहरका विच सुदुरपश्चिम प्रदेशमा गत चैत्र देखी हाल सम्म १ सय ५० बलात्कार सम्वन्धीका मुद्दा दर्ता भएका छन् ।
सुदुरपश्चिम प्रदेश प्रहरी कार्यालयले दिएको तथ्यांकका आधारमा प्रदेशभरमा ६ महिलाको अबधिमा उक्त संख्यामा जबरजस्ती करणी र उद्योगका मुद्दाहरु दर्ता भएका हुन् ।
गत चैतमा मात्र प्रदेशका ५ जिल्लामा १४ वटा बलात्कार सम्वन्धी घटनाहरु दर्ता भएका छन् । प्रदेशको राजधानी समेत रहेको कैलाली जिल्लामा चैत्र महिनामा मात्र ६ वटा मुद्दा दर्ता भएका छन् । त्यस्तै कञ्चनपुर जिल्लामा ३, बाजुरा र बझाङ जिल्लामा २-२ र बैतडी जिल्लामा एक वटा मुद्दा दर्ता भएको प्रदेश प्रहरी कार्यालय श्रोतले जनाएको छ ।
त्यस्तै बैशाख महिनामा प्रदेशका ६ वटा जिल्लामा जबरजस्ती सम्वन्धीका १४ वटा दर्ता भएका छन् । कैलालीमा ८, कञ्चनपुरमा ३ र डोटी, अछाम, बाजुरा र दार्चुला जिल्लाहरुमा १-१ वटा मुद्दाहरु दर्ता भएका हुन् ।
गत जेष्ट महिनामा जबरजस्ती करण र करणी उद्योगका २८ मुद्दा दर्ता भएका छन् । जेष्ट महिनामा करणीका २३ र उद्योगका ५ वटा मुद्दा दर्ता भएको प्रदेश प्रहरीको तथ्यांकमा उल्लेख छ ।
त्यस्तै गत असार महिना प्रदेशभरमा जबरजस्ती करणी सम्वन्धीका सबै भन्दा बढी मुद्दाहरु दर्ता भएका छन् । असार महिलामा जबरजस्ती करणीका र करणी उद्योग गरि ३७ मुद्दा दर्ता भएका हुन् । उक्त महिनामा २१ वटा मुद्दा प्रदेशको राजधानी कैलालीमा मात्र दर्ता भएका छन् ।
त्यस्तै श्रावण महिनामा प्रदेशभरमा जबरजस्ती करणी सम्वन्धीका ३२ मुद्दा दर्ता भएका छन् । सो महिनामा करणीका २१ र उद्योगका ११ मुद्दा दर्ता भएका हुन् । त्यस्तै भाद्र महिनामा प्रदेशभरमा १५ ओटा करणी सम्वन्धीका मुद्दा दर्ता भएका प्रदेश प्रहरीको तथ्यांकमा उल्लेख छ ।
प्रदेशका ९ ओटै जिल्लाहरुको तथ्यांकलाई हेर्ने हो भने गएको ६ महिनामा सबै भन्दा बढी प्रदेशको राजधानी रहेको कैलाली जिल्लामा करणी सम्वन्धी मुद्दा दर्ता भएको देखीन्छ । करणी तथा करणी उद्योगमा दर्ता भएका मुद्दाहरुमा पिडित रहेकामा बालबालिका तथा किसोरीहरुको संख्या बढी रहेको छ । मुद्दा दर्ताको प्रकृति हेर्दा सामुहिक बलात्कारका घटनाहरु समेत रहेको प्रदेश प्रहरीले जानकारी दिएको छ ।
