कैलाली /कैलाली प्रहरीले ५ किलो ६९० ग्राम चरेश र ४ ग्राम ९० मिलिग्राम खैरोइनसहित पाँच जनालाई पक्राउ गरेको छ।
लागुऔषध नियन्त्रण ब्युरो धनगढी शाखा, वडा प्रहरी कार्यालय धनगढी र त्रिनगर प्रहरी चौकीबाट खटिएको संयुक्त टोलीले धनगढी उपमहानगरपालिका–२ त्रिनगर ब्यारेलमा चेकजाँच गर्ने क्रममा पहिलो पक्राउ गरेका हुन्।
३५ वर्षीय बिरबहादुर रावल (डोटी, हाल गोदावरी–१) लाई सुदूरपश्चिम प्रदेश ०४००१ प ०६६५ नम्बरको मोटरसाइकलसहित पक्राउ गर्दा उनको साथबाट २ ग्राम ७६० मिलिग्राम खैरोइन बरामद भएको प्रहरीले जनाएको छ।
सोही क्रममा ३२ वर्षीय मोहन मल्ल (चुरे–३) को मोबाइल खोलभित्र लुकाइराखेको ५९० मिलिग्राम खैरोइन पनि बरामद भएको छ।
यस्तै, धनगढी–२ मिलनचोकस्थित राम बोहरा (बझाङ, हाल धनगढी–२) को होटलमा प्रहरीले चेकजाँच गर्दा ५ किलो ६९० ग्राम चरेश बरामद भएको छ।
त्यस्तै, धनगढी–१२ जुगेडाबाट खटिएको प्रहरी टोलीले मोटरसाइकल (सुदूरपश्चिम प्रदेश ०१०१३ प २३४५) चालक २३ वर्षीय बिजय विक र पछाडिबाट सवार २२ वर्षीय प्रदिप रानालाई नियन्त्रणमा लिँदा ७४० मिलिग्राम खैरोइन बरामद भएको छ।
पक्राउ परेका पाँचै जनालाई जिल्ला प्रहरी कार्यालय कैलालीमा राखी थप अनुसन्धान भइरहेको जिल्ला प्रहरी कार्यालय कैलालीका प्रहरी निरीक्षक तथा सह–प्रवक्ता लोकराज जोशीले जानकारी दिएका छन्।
