काठमाडौं ।नेकपा एमालेका केन्द्रीय सदस्य ऐन महरलाई एक महिलाको चरित्र हत्या गरेको अभियोगमा प्रहरीले नियन्त्रणमा लिएको छ।

साइबर ब्युरोका एसपी दीपक अवस्थीका अनुसार ५ भदौमा हुलाकमार्फत परेको उजुरीपछि महरविरुद्ध अनुसन्धान प्रक्रिया अगाडि बढाइएको हो। जिल्ला अदालत, काठमाडौँले ९ भदौमा पक्राउ अनुमति दिएपछि बुधबार उनी सोधपुछका लागि उपस्थित हुँदा पक्राउ गरिएको हो।

जाहेरीमा महरमाथि विद्युतीय कारोबार ऐन, २०६३ को दफा ४७ उल्लङ्घन गरेको दाबी गरिएको छ। यस दफामा अनलाइन वा डिजिटल माध्यममार्फत अपमानजनक, अश्लील, द्वेष फैलाउने वा सार्वजनिक शिष्टाचारविरुद्धका सामग्री प्रकाशित वा प्रसारण गर्ने कार्यलाई दण्डनीय मानिएको छ। यसअन्तर्गत एक लाख रुपैयाँसम्म जरिवाना वा पाँच वर्षसम्म कैद वा दुवै सजाय हुनसक्ने व्यवस्था छ।

साइबर ब्युरोका एक अधिकारीका अनुसार, महरले सामाजिक सञ्जालमा लाइभमार्फत पीडित भनिएकी महिलाको चरित्र हत्या गरेको अभियोग छ। यसअघि सो महिलाले महरमाथि बलात्कार गरेको भन्दै उजुरी दर्ता गर्न खोजेकी थिइन्, तर प्रारम्भिक चरणमा प्रहरीले उजुरी नलिएपछि पाटन उच्च अदालतको आदेशमा मात्र अनुसन्धान अघि बढाइएको थियो।

यता, सो महिलामाथि पनि विद्युतीय कारोबार ऐन अन्तर्गतकै अभियोगमा पक्राउ गरिएको थियो।