कैलाली /कैलालीको जानकी गाउँपालिका–६, कर्णाली नदी नजिकको वन क्षेत्रमा नयाँ प्रजातिको कछुवा भेटिएको छ। खपटामा ताराजस्तै ढाँचा भएको यो कछुवा इन्डियन स्टार कछुवा भएको विशेषज्ञहरूले पुष्टि गरेका छन्।
भारत, पाकिस्तान र श्रीलंकामा पाइने यो प्रजाति नेपालमा यसअघि अभिलेख नभएको सरिसृप विज्ञ प्रा. करनबहादुर शाहले जानकारी दिनुभयो। उहाँका अनुसार, “यो प्रजाति नेपालमा अहिलेसम्म भेटिएको थिएन, यसले नेपालको जैविक विविधतामा नयाँ अध्याय थपेको छ।”
भदौ ३ गते बाख्रा चराउन गएका बालबालिकाले उक्त कछुवा देखेपछि उद्धार गरिएको थियो। संरक्षणकर्मी विजयराज श्रेष्ठका अनुसार, बालबालिकाले देखेको खबर पाएपछि टोलीसँगै पुगेर कछुवालाई सुरक्षित रूपमा सोही दिन प्राकृतिक बासस्थानमै छाडिएको हो।
कछुवा कैलाशेश्वर र जगतपुर सामुदायिक वन आसपासको क्षेत्रमा भेटिएको हो। संयोगवश उक्त क्षेत्रमा अनुगमनका लागि पुगेका श्रेष्ठ र स्थानीयहरूले नै उद्धार कार्यमा सहयोग गरेका थिए।
अन्तर्राष्ट्रिय प्रकृति संरक्षण संघको रातो सूचीमा रहेको इन्डियन स्टार कछुवा दुर्लभ र संवेदनशील प्रजाति मानिन्छ। नेपालमा पहिलो पटक भेटिएकाले यसले संरक्षण र अध्ययन दुवै दृष्टिले महत्त्वपूर्ण योगदान पुर्याउने विज्ञहरूको भनाइ छ।
