कैलाली,
कैलालीको गौरीगङ्गा नगरपालिकामा नगरप्रमुख देवीदत्त कँडेलमाथि गम्भीर प्रश्न उठेको छ। आरोप अनुसार नगरपालिकाको राजस्व रकम ठेकेदारसँगको मिलेमतोमा उनको आफ्नै निजी मनकामना पेट्रोल पम्पको खातामा जम्मा भएको पाइएको हो।
घटनाअनुसार वडा नं. ४ अन्तर्गतको जोगनिया तालको ठेक्काबाट उठेको करिब पाँच लाख रुपैयाँ दुई वर्षअघि पेट्रोल पम्पको खातामा पुगेको खुलेको छ। नगरप्रमुख कँडेलले भने आफूले जानाजानी रकम पेट्रोल पम्पमा हाल्न नलगाएको र ठेकेदारसँग पुरानै कारोबार भएकाले रकम सोही खातामा गएको हुनसक्ने दाबी गरेका छन्।
तर वडा नं. ९ का वडाध्यक्ष राजकुमार थारू भन्छन्, “कार्यपालिकामा कुरा उठेपछि नगरप्रमुखले गल्ती स्वीकार गर्दै पैसा फिर्ता गर्ने प्रतिबद्धता जनाउनुभएको थियो। तर अहिलेसम्म रकम राजस्व शाखामा दाखिला भएको छैन।”
ठेक्का लिने ठेकेदार मोहन गिरीले पनि रकम दुई पटक पेट्रोल पम्पमै राखेको स्वीकार गरेका छन्। उनले भने, “नगरप्रमुखसँग पुरानो कारोबार भएकाले सजिलो ठानेर पेट्रोल पम्पमै जम्मा गरें। पछि आवश्यक पर्दा रकम फिर्ता पनि लिएँ।”
यता, राजस्व शाखाका प्रमुख चित्रराज जोशीले दुई पटक पत्राचार गरेर पनि रकम पालिकाको खातामा नआएको जनाए। स्थानीयबासीहरूले यो विषयलाई गम्भीर ठहर गर्दै छानबिन समिति गठन गर्नुपर्ने माग गरेका छन्।
जोगनिया ताल मात्र होइन, गौरीगङ्गा नगरपालिकाका अन्य तालहरू पनि ठेक्कामा दिइएका छन् तर कति पैसामा, कसलाई दिइयो भन्नेबारे पालिकासँग ठोस अभिलेख नै छैन।
यसअघि पनि नगरप्रमुख कँडेल र प्रमुख प्रशासकीय अधिकृत धर्मानन्द जोशीबीच विवाद बढ्दा नगरप्रमुखका आफन्तद्वारा कार्यकक्षमै आक्रमणसमेत भएको थियो।
