कैलाली /कैलालीको बाह्रवन साझेदारी वनमा करिब एक दशकदेखि थुपारिएको करोडौँ मूल्यको काठ कुहिन थालेको छ। आर्थिक वर्ष २०७१/७२ मा कटान गरिएको ‘सी’ र ‘डी’ ग्रेडको काठ अहिले पनि लिलाम हुन नसकेर वनमै रहेको हो।
वन समितिका अध्यक्ष वीरबहादुर चोखालका अनुसार करिब १३ हजार क्युबिक फिट कुकाठ माटोमा परिणत भइसकेको छ भने १२/१३ हजार क्युबिक फिट सालको काठ पनि बिग्रँदै गएको छ। “कागजमा देखिएको काठको मात्रा धेरै भए पनि, वास्तविक रूपमा काठको ठूलो हिस्सा कुहिसकेको छ,” उनले बताए।
समितिले पटक–पटक लिलामी सूचना जारी गरे पनि ठेकेदारहरूले चासो नदेखाएपछि काठ वर्षौंदेखि थन्किएको हो। वन ऐनअनुसार बिक्री हुन नसकेको काठको पुनः मूल्याङ्कन र ग्रेडिङ गर्न सातदेखि १० वर्ष पर्खनुपर्ने नियमका कारण यसबीचमा गुणस्तर घट्दै गएको जनाइएको छ।
हाल ‘सी’ ग्रेड काठको मूल्य प्रतिक्युबिक फिट ९ सय रुपैयाँ र ‘डी’ ग्रेडको मूल्य ७ सय रुपैयाँ तोकिएको छ। बाँकी रहेको सम्पूर्ण काठ ‘डी’ ग्रेडमै बिक्री गर्नुपरे पनि यसको मूल्य करिब एक करोड ८९ लाख रुपैयाँ हुने अनुमान गरिएको छ।
स्थानीय उपभोक्ताहरू घरायसी प्रयोजनका लागि काठ अभावमा रहँदा, वनमा भने मूल्यवान काठ बिग्रिएको समितिका सदस्य राजेन्द्रप्रसाद जोशीको गुनासो छ। यस वनमा केही वर्षअघि वैज्ञानिक वन व्यवस्थापनको काम सुरु भए पनि, त्यसबेला व्यापक अनियमितता भएको आरोप लागेर २०७५ सालमा प्रदेशसभाको अर्थ, विकास तथा प्राकृतिक स्रोत समितिले अनुगमन गरेको थियो।
