कैलाली /कैलाली कारागारमा हाल कैदीबन्दीको वास्तविक संख्या यकिन गर्न गणना कार्य सुरु गरिएको छ। शनिबार मात्रै जिम्मेवारी सम्हालेका जेलर जालन्धर भुसालले प्रत्येक कैदीलाई बोलाएर अनुहार हेर्दै संख्या मिलाउने काम अगाडि बढाएका हुन्।
कारागार प्रशासनका अनुसार, भित्र तनावपूर्ण अवस्था रहँदा पनि गणना कार्य जारी छ। गत शुक्रबार कारागारभित्र भएको हिंसात्मक झडपमा एक जनाको मृत्यु भएको थियो भने ४९ जना घाइते भएका थिए। घटनापछि ३६ घण्टा बितिसक्दा पनि स्थिति पूर्ण रूपमा नियन्त्रणमा आउन सकेको छैन।
प्रशासनको सक्रियतामा आइतबार दिउँसोदेखि कैदीबन्दीको तथ्याङ्क यकिन गर्ने प्रयास भइरहेको हो। भित्रको अवस्था तनावपूर्ण भएपछि कैदीबन्दीका आफन्तहरू कारागार परिसरमा पुगेर सोधखोज गरिरहेका छन्। तर, प्रशासनले उनीहरूलाई गेटबाहिरै रोकेको छ।
स्रोतका अनुसार, कैदीबन्दीहरूले थुनुवा कक्ष भित्रबाट ताला लगाएर नियन्त्रणमा लिएका छन् र गृह मन्त्रालय वा कारागार विभागका प्रतिनिधि आएपछि मात्र ढोका खोल्ने बताएका छन्।
करिब १५० जनाको क्षमता भएको कैलाली कारागारमा अहिले झण्डै ७०० कैदीबन्दी छन्। क्षमताभन्दा धेरै कैदी राखिँदा यस्ता तनावपूर्ण घटना समय–समयमा दोहोरिँदै आएको छ।
