सिलगढी /नेकपा माओवादी केन्द्रको स्थायी समिति बैठक आज पनि बस्ने भएको छ। बैठक बिहान ११ बजे पार्टी केन्द्रीय कार्यालय पेरिसडाँडामा सुरु हुने कार्यक्रम तय भएको छ।
आजको बैठकमा पार्टी अध्यक्ष पुष्पकमल दाहाल ‘प्रचण्ड’ले शुक्रबार प्रस्तुत गरेको राजनीतिक प्रस्तावमाथि स्थायी समिति सदस्यहरूले आ–आफ्ना धारणा राख्नेछन्।
शुक्रबारको बैठकमा प्रचण्डले वर्तमान राजनीतिक अवस्था, पार्टीभित्रको परिस्थिति तथा सरकार सञ्चालनसँग सम्बन्धित विषयमा विस्तृत रूपमा ब्रिफिङ दिएका थिए।
यसैबीच, उक्त बैठकमा प्रचण्डले पार्टी उपमहासचिव जनार्दन शर्मालाई अनुशासनको उल्लङ्घन गरेको भन्दै कारबाहीको चेतावनी पनि दिएका छन्।
पार्टीको आन्तरिक विषयलाई सार्वजनिक रूपमा व्यक्त गरेको भन्दै अध्यक्ष प्रचण्डले असन्तुष्टि जनाउँदै, “अनुशासन विपरीत गतिविधि गरेमा कारबाही हुन्छ,” भनी स्पष्ट सन्देश दिएका छन्।
पार्टी स्रोतका अनुसार, केही नेताहरूको सार्वजनिक अभिव्यक्तिप्रति अध्यक्ष प्रचण्ड असन्तुष्ट छन् र बैठकमा अनुशासन सुदृढीकरणबारे पनि छलफल हुने अपेक्षा गरिएको छ।
स्थायी समितिको बैठक शृंखलामार्फत पार्टीको आगामी राजनीतिक रणनीति, आन्तरिक संरचनागत सुधार, तथा संगठन विस्तारका विषयमा निर्णायक छलफल चलिरहेको छ।
