सिलगढी, गएराति देशका धेरै ठाउँमा हल्कादेखि मध्यम वर्षा भएको मौसम पूर्वानुमान महाशाखाले जनाएको छ। विशेषगरी सिन्धुपाल्चोक, काठमाडौँ, कास्की, लमजुङ, पर्वत, पाल्पा, मुगु, इलाम र धनकुटाजस्ता जिल्लामा मध्यम वर्षा मापन गरिएको छ।
सप्तरी लगायत मधेश प्रदेशका अन्य केही स्थानमा पनि हल्का वर्षा भएको छ। पछिल्लो १२ घण्टामा सबैभन्दा धेरै वर्षा सिन्धुपाल्चोकको नुर्पगाउँमा मापन गरिएको छ, जहाँ १२० मिलिमिटर वर्षा भएको छ।
सिन्धुपाल्चोकका बोल्डे, ढुङ्गे, नुर्पगाउँ, तार्के घ्याङ, मेलम्ची घ्याङ र भोताङ वर्षामापन केन्द्रहरूमा समेत मध्यम वर्षा मापन भएको महाशाखाले जनाएको छ। ती क्षेत्रमा थप वर्षा हुन सक्ने सम्भावना रहेकाले बाढी र पहिरोको जोखिमलाई ध्यानमा राखी सतर्कता अपनाउन बाढी पूर्वानुमान महाशाखाले आग्रह गरेको छ।
हाल देशभर मनसुनी वायुको प्रभाव सक्रिय रहेकाले आज पनि देशका पहाडी भू–भागका केही स्थानहरूमा र तराई भू–भागका थोरै ठाउँहरूमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ।
महाशाखाका अनुसार कोशी र गण्डकी प्रदेशका पहाडी क्षेत्रमा एक/दुई स्थानमा भारी वर्षा हुने सम्भावना रहेकाले सम्बन्धित क्षेत्रका बासिन्दालाई विशेष सतर्कता अपनाउन अनुरोध गरिएको छ।
