सिलगढी / कैलाली र कञ्चनपुर जिल्लामा भन्सार छली गरिएका सामानहरू प्रहरीले बरामद गरेको छ।
कैलालीको धनगढी उपमहानगरपालिका–१९ लल्लीपुर र टीकापुर नगरपालिका–९ बालुवाटार चोकबाट अबैध रूपमा भारतबाट भन्सार छली गरी ल्याइएका अन्दाजी मूल्य ५८ हजार ८६० रुपैयाँ बराबरका सामानहरू प्रहरीले बरामद गरेको हो।
जिल्ला प्रहरी कार्यालय कैलाली मातहतका टोलीहरूद्वारा गस्तीका क्रममा फेला पारिएका ती सामानहरूमा सुर्ती, सुपारी, मेहेन्दी, पानीपुरी, डटपेन, बोइलर कुखुरा लगायत परेका छन्। सबै सामानहरू बेवारिसे अवस्थामा फेला परेका थिए।
यस्तै, कञ्चनपुरको भीमदत्त नगरपालिका–११ स्थित भुजेलाबाट पनि अबैध रूपमा भारतबाट ल्याइएका करिब १ लाख १० हजार ६० रुपैयाँ बराबरका भन्सार छलीका सामान बरामद गरिएका छन्।
इलाका प्रहरी कार्यालय गड्डाचौकीबाट खटिएको गस्ती टोलीले फेला पारेका ती सामानहरूमा विभिन्न प्रकारका कपडा, हार्डवेयर, किराना सामग्री लगायत रहेका छन्।
दुवै घटनाका सम्बन्धमा आवश्यक अनुसन्धान भइरहेको प्रहरीले जनाएको छ।
