सिलगढी । भारतको उत्तराखण्ड प्रदेशमा हुन गइरहेको पञ्चायत निर्वाचनलाई मध्यनजर गर्दै बैतडी र दार्चुला जिल्लास्थित नेपाल–भारत सीमा नाका बन्द गरिने भएको छ।
भारतमा यही जुलाई २४ र २८ (नेपाली पात्रोअनुसार साउन ८ र १२ गते) पञ्चायत निर्वाचन हुने भएकाले सुरक्षा चनौतीका सम्भावित जोखिमलाई ध्यानमा राख्दै दुवै जिल्लाका सीमा नाका अस्थायी रूपमा बन्द गरिने निर्णय गरिएको हो।
दार्चुलाका प्रमुख जिल्ला अधिकारी पुण्यविक्रम पौडेलका अनुसार पुलघाट नाका जुलाई २१ (साउन ५ गते) बेलुकादेखि जुलाई २४ (साउन ८ गते) बिहानसम्म पूर्ण रूपमा बन्द रहनेछ। यस्तै, बैतडीको झुलाघाट नाका साउन ९ गतेदेखि १२ गतेसम्म बन्द गरिनेछ।
उनका अनुसार सो अवधिमा अत्यावश्यक अवस्थामा दुवै देशको आपसी सहमतिमा नाका खोल्न सकिने व्यवस्था गरिएको छ। सुरक्षा र शान्ति सुरक्षालाई प्राथमिकता दिँदै यस्तो निर्णय गरिएको जनाइएको छ।
