कैलाली — कैलालीको कैलारी गाउँपालिका वडा नम्बर ४ र ६ जोड्ने घुरहा नदीको पुल अधुरो मर्मत भएपछि आवागमनमा थप जोखिम बढेको भन्दै स्थानीयवासीले गुनासो गरेका छन्।
दशकअगाडि निर्माण गरिएको सो पुलको पूर्वतर्फ नदीले धार परिवर्तन गर्दा पहुँचमार्ग कटान भएर भत्किएको थियो। त्यसपछि प्रदेश सरकारको ५० लाख रुपैयाँको बजेटमा पुल मर्मत कार्य थालिएको हो। तर स्थानीयले खर्चअनुसार काम नगरेको आरोप लगाउँदै मर्मतपछि पनि सहज आवागमन हुन नसकेको गुनासो गरेका छन्।
स्थानीय बासिन्दा बीरबहादुर चन्दले भने, “५० लाख खर्च गरेर मर्मत गरेको भनिन्छ, तर अहिले पनि आवत–जावत गर्न गाह्रो छ। यसलाई मर्मत काम भन्नै मिल्दैन।” उनले इन्जिनियरलाई पटक–पटक जानकारी गराए पनि “बजेट अनुसारको काम भयो” भन्दै पन्छिएको बताए।
स्थानीय सरस्वती मल्ल सिंहका अनुसार, असार ४ गते मात्र हतार-हतार काम सम्पन्न गरिएको हो। ठेकेदारले काम पूरा नगरेपछि बाँकी काम पेटी ठेकेदारमार्फत गरिएको थियो। पुल मर्मतको ठेक्का भूमिराज उदयदेव निर्माण सेवाले पाएको थियो, जसले वैशाख १८ गतेभित्र काम सम्पन्न गर्नुपर्ने सम्झौता गरेको थियो।
पूर्वाधार विकास कार्यालयका साइट इन्जिनियर देवीकुमारी बलायरले भने मर्मत कार्य बजेटअनुसार नै सम्पन्न गरिएको दाबी गरेकी छिन्।
स्थानीयहरू भने मनसुन सुरु भइसकेको अवस्थामा पुल पुनः कटानमा पर्न सक्ने भन्दै चिन्तित छन्।
