कञ्चनपुर — जिल्ला प्रशासन कार्यालय कञ्चनपुरले जिल्लाका सबै स्थानीय तहलाई छाउपडी गोठ भत्काउने अभियान तत्काल सञ्चालन गर्न निर्देशन दिएको छ।
प्रमुख जिल्ला अधिकारी लक्ष्मण ढकालको हस्ताक्षरसहित सोमबार नौवटै पालिकामा पठाइएको पत्रमा कृष्णपुर नगरपालिका–१ मा छाउगोठमा सुतिरहेकी कमला दमाइको सर्पदंशबाट मृत्यु भएको घटनालाई गम्भीर रूपमा लिँदै यस्तो अभियान सञ्चालन गर्न भनिएको हो।
पत्रमा परम्परागत रूपमा चल्दै आएको छाउपडीजस्तो कुप्रथाको अन्त्यका लागि विशेष अभियान सञ्चालन गर्नुपर्ने आवश्यकता औंल्याइएको छ। साथै, पालिकाहरूले आवश्यक निर्णय गरी छाउगोठ भत्काउन अनुरोध गरिएको छ।
२८ वर्षीया कमला दमाईलाई असार २७ गते राति छाउगोठमा सुतिरहँदा सर्पले टोकेको थियो। उनलाई उपचारका लागि सेती प्रादेशिक अस्पतालमा लगिए पनि असार २८ गते मृत्यु भएको थियो।
यसअघि आइतवार, कृष्णपुर नगरपालिकाले पनि आफ्ना सबै ९ वडालाई १५ दिनभित्र रहेका छाउगोठहरूको निरीक्षण गरी भत्काउन निर्देशन दिएको थियो। नगरपालिकाले निर्देशन पालना नगरे कानुनी कारबाहीसहित रु १० हजारसम्म जरिवाना गरिने चेतावनीसमेत दिएको छ।
