कञ्चनपुर / कञ्चनपुरको कृष्णपुर नगरपालिका–१ निगालीमा छाउगोठमा सुतिरहेकी एक महिलाको सर्पको टोकाइबाट मृत्यु भएको छ।
शुक्रबार राति सुतिरहेका बेला २८ वर्षीया कमला दमाईलाई सर्पले गालामा टोकेको थियो। तत्कालै उनलाई उपचारका लागि अत्तरिया अस्पताल हुँदै सेती प्रादेशिक अस्पताल, धनगढी ल्याइएको भए पनि उपचारकै क्रममा उनको मृत्यु भएको श्रीमान् पुरन दमाईले जानकारी दिएका छन्।
कमला दुई महिनाअघि मात्र भारतबाट घर फर्किएकी थिइन्। परिवारको पक्की घर हुँदाहुँदै पनि समाजको रुढीवादी सोचका कारण उनी छिमेकीको घरछेउमा बनाइएको असुरक्षित छाउगोठमा बस्न बाध्य भएकी थिइन्।
घटना भएपछि स्थानीयस्तरमा छाउपडी प्रथाविरुद्ध पुनः आवाज उठ्न थालेको छ। कमलाको मृत्युप्रति शोक व्यक्त गर्दै नागरिक समाज, अधिकारकर्मीहरू र युवाहरूले दोषी परम्परागत अभ्यास अन्त्य गर्न माग गरेका छन्।
कमलालाई प्राथमिक उपचारका लागि अत्तरिया स्थित एभरेस्ट एकेडेमी अस्पताल र नवजीवन अस्पताल पनि लगिएको बताइएको छ। तर अवस्था गम्भीर हुँदै गएपछि उनलाई अन्ततः सेती प्रादेशिक अस्पताल पुर्याइएको थियो, जहाँ उपचारकै क्रममा मृत्यु भयो।
छाउपडी प्रथाले अझै पनि महिलालाई जीवनको जोखिममा राखिरहेको यो घटनाले देखाएको छ। पक्की घर हुँदा पनि परम्पराको नाममा महिलालाई पशुजस्तै गोठमा बस्न बाध्य बनाउने समाजप्रति कडा प्रश्न उठेको छ।
